National Convention matu Akyu Hpyi

The Kachin Post

May 2, 2004 — Myitkyina mare na makam masham hpung salang ni woi awn let National Convention de sa du lung na dat kasa ni hte woi awn galaw sa ai ni matu laksan akyu hpyi ai lam hpe May 1 ya jahpawt hta galaw ai lam chye lu ai.

Dai Akyu hpyi poi hta Wunpawng Mungdan Shanglawt Hpung KIO ningbaw Du Kaba Lamung Tu Jai, New Democratic Army-Kachin NDA-K ningbaw Du Kaba Zahkung Ting Ying, Sara Kaba Sumlut Naw hte NC de sa du lung na dai hpung lahkawng a dat kasa ni shanglawm wa ai rai nga ai.

Akyu hpyi poi hpe Myitkyina mare Shatapru lawk na Wunpawng Mungbawng Rapdaw rung hta galaw ai rai n’na Sara Kaba Gum Se, Saradaw Francis Daw Tang, Rev. Hkalam Sam Sun, Jau Thomas Gum Rai Awng, Rev. Zau Hkawng, Rev. D. Sam La hte Rev. Mading Zung Kyang ni shang lawm ai lam chye lu ai.

May 17 ya hta Myen Hpyen du ni woi awn let Yangon mare makau na Nyaunghnapin Kwin kaw galaw hpang na National Convention de sa du lung na KIO hte NDA-K dat kasa ni gaw laiwa sai bat kawn Myitkyina mare hta sa du bawng ban nga sai lam chye lu ai.

Dai hku bawng ban ai lam ni hpe Wunpawng Mungbawng Rapdaw na salang ni hte mung bawngban ai lam chye lu ai.

Du Kaba Dr. Manam Tu Ja (Tingnyang-up malai 2), Du Kaba Sumlut Gum Maw (Ningtau Ninggawn Amu Madu), Du Kaba Lahpai La (Ginjaw Tara Rung Lit Hkam), Du Jum Lahpai Zau Raw (Kut Hkai dat kasa rung lit hkam) hte Du Jum Waw Hkyung Sin Wa (Ginjaw Committee rung Amu Madu) ni gaw KIO dat kasa ni hku na NC de sa lung na rai nga ai.

NDA-K kaw na gaw Du Kaba Ze Lum, Du Kaba Malang Tu, Du Kaba Lahpung, Salang Chang Lang hte Salang Rahkwi Hpung ni hpe NC lung na datkasa hku na maning kawn san da sai rai nga ai.

Ya ten hta Myen mung Democracy ningbaw Aung San Suu Kyi hpe rim da ai kaw na n dat shi ai hte maren, shi a National League for Democracy NLD parti hku na mung shanhte tang shawn da ai lam ni hpe Myen hpyen du ni hkap la yang she NC de shanglawnm na lam tsun wa ma ai.