National Convention Bai Hpang na N’dau
The Kachin Post
March 31, 2004 — Myen Mungdan a mungmasa manghkang ni hpe hpungdim dat na matu yaw let Mung Hpawm Amyusha Mungbawmg Zuphpawng National Convention hpe May 17 ya hta bai galaw hpang wa na re lam, Myen Hpyen Atsuya mani n’dau wa ai hpe Myanmar Radio shiga hku chye lu ai.
Shawng lang na National Convention NC gaw 1993 ning January 9 ya hta hpang wa n’na, Aung San Suu Kyi woi awn ai National League for Democracy Parti NLD n shang lawm mat ai hpang 1996 ning March 31 ya hta jahkring da ai rai nga ai. NLD dat kasa ni gaw 1995 ning November shata kawn n shang lawm sai rai nga ai.
N’dai lang na NC hpe gaw 2003 ning August shata hta Myen mung Hkringmang Daju byin wa ai Myen hpyen du Khin Nyunt kawn n’dau da ai Ninggam 7 lawm ai Mungmasa Lam Matsun a shwang ningnan na ninggam langai rai nga ai.
N’dai NC galaw na hta gara uhpung uhpawng ni hpe mung tara shang saw shaga da ai lam n nga shi ai raitim, Myen hpyen du ni hte gap hkat jahkring simsa lam la da ai Myusha rawtmalan hpung yawng ngu na daram gaw NC galaw sa wa na hpe madi shadaw let sa du shanglawm na matu hkyen nga sai rai nga ai.
1990 ning Myen mung Ra Lata poi hta aging agang dang da ai NLD parti hte kaga Myusha parti ni hpe gaw ya ten du hkra NC lung na matu saw shaga ai lam n nga shi ai rai n’na NLD hte Myusha parti ni gaw ya bai galaw na NC hpe madi shadaw ai lam n nga ai rai nga ai.
Myen mung a grupyin Asia mungdan ni kawn lai n’na Sinna mungdan law malawng gaw NC galaw na hpe grai wa madi shadaw ai lam n nga tim, lama galaw sa wa ai shaloi Aung San Suu Kyi hte shi a parti NLD hpe shang lawm shangun ra na re ngu matsun da ma ai.
Wunpawng Mungdan Shanglawt Hpung KIO gaw NC galaw na hte seng n’na shawng ningnan hkaptau la wa ai uhpung langai rai n’na NC de sa du lung na matu da kasa marai 5 hpe mung lata san da sai rai nga ai. Ya ten du hkra, KIO gaw NC de shanglawm na hte seng n’na daw dan da ai hpe galai shai ai lam n nga ai lam chye lu ai.
Zahkung Ting Ying woi awn ai New Democratic Army-Kachin NDA-K hte Mahtu Naw woi awn ai Kachin Defense Army KDA ni mung NC lung na matu ga sadi jaw da sai uhpung ni rai nga ai.
