Lazing Bawk a Hpyen Ma Langai Sat Kau Hkrum ai N re Lam KIO Sanglang Dan

The Kachin Post

March 30, 2004 — Du Kaba Lazing Bawk n nga mat ai hte seng n’na shi a asak sin hpyen ma langai sat kau hkrum ai gaw n re ai lam hpe Wupawng Mungdan Shanglawt Hpung KIO kawn sanglang dan wa ai.

Du Kaba Lazing Bawk a asak sin hpyen ma langai rai nga ai N’hkai Nan Awng hpe March 9 ya shana hta rim jep nga laman sat kau ai ngu shagrin la n lu ai shiga ni byin pru wa ai rai nga ai. Dai shiga laika hpe Myu Tsaw Ginwang E-mail group (myutsawginwang@groups.msn.com) na E-mail langai hta lawm ai lam chye lu ai.

Dai lam hte seng n’na KIO Ninggaw Amu Madu Du Kaba Gam Shawng gaw “ya asak hkrung n’na, Kawa hte rau Laiza e nga nga ai” ngu shi a sanglang dan ai laika hta ka da nga ai. “Ahkyak ai jahpan kaw n lawm ai re majaw, jep sagawn commission de jahpan ap ai shaloi N’hkai Nan Awng a mying pyi n lawm ai re.”

Du Kaba Lazing Bawk n nga mat ai hpang, N’hkai Nan Awng hpe gaw, asak sin hpyen ma ni n kyet ai majaw byin ai ngu n’na “kalang lahkawng lang, mara shagun gayet sharin shaga ai lam nga ai. Dai hpang dat kau ai,” ngu Du Kaba Gam Shawng tusn wa ai.

N’hkai Nan Awng gaw ya ten hta koi yen nga ai Du Kaba Lasang Awng Wa a Myusha Shimlam Dap na magam gun usa langai rai n’na January shata Ginjaw hta byin ai manghkang hte seng n’na mung shi hpe mara raw ya sai lam chye lu ai. Dai hpang N’hkai Nan Awng gaw shi a Kawa N’hkai Brang Shawng hte Du Kaba Lazing Bawk ni nawn ai lam a marang e, shi hpe Du Kaba Lazing Bawk a asak sin dap (Sin-Kawp Guard) hta hprai bang ai lam chye lu ai.

Wunpawng Mungdan Shanglawt Hpyen Dap KIA Ningtau Dap Awn Daju Du Kaba Lazing Bawk gaw lai wa sai February 26 ya hta Laiza mare na shi n’ta nam dum hta Bawm hte kapaw sat kau hkrum ai rai nga ai.