Bawmwang La Raw hpe KIO a Hpyen Kaba No. 1 ngu Masat
The Kachin Post
June 30, 2004— Kachin National Organization a ningbaw langai rai nga ai Du Wa Bawmwang La Raw hpe Wunpawng Mungdan Shanglawt Hpung, KIO, a Je Bat Hpyen Kaba No. 1 ngu masat dat sai lam chye lu ai.
N’dai hku masat ai lam hpe June 23 n’htoi hte shabra ai KIO Ginjaw committee a n’dau shabra laika hta ka da nga ai. “Salang Bawmwan La Raw hpe je bat hpyen kaba No. 1 hku masat da ai.”
Dai n’dau laika hta ka da ai hku rai yang, Bawmwang La Raw gaw January shata praw hta KIO Ginjaw hta byin wa ai mang hkang hpe ningpawt ninghpang maw mawn hkrang shapraw galaw sa wa ai wa re majaw Hpyen Kaba langai hku masat ai lam chey lu ai.
Bawmwang La Raw gaw maigan de nga n’na mung masa shamu shamawt na n mai ai majaw, Jinghpaw mung kata shang let KIO magam gun ni hpe jai lang let, shi byin mayu ai lam ni hpe hkrang shapraw ai re lam KIO n’dau laika hta tusn da nga ai. “Shi myit tawn da ai lam ni hkrang shapraw mayu ai n’hkan e, masing kaba hku KIO Ginjaw hpe shang chying lau dat ai re hpe sawk sagawn mahtai shapraw la lu ai re,” ngu KIO a n’dau shabra laika hta ka da nga ai.”
Duwa Bawmwang La Raw gaw England mung dan kaw nga ai wa rai n’na, January shata KIO Ginjaw hta byin ai manghkang hta shang lawm wa let, de hpang Du Kaba Lasang Awng wa ni hte rau Miwa Gunsan mung de hprawng mat wa ai rai nga ai.
KIO Ginjaw a masat ai lam hte seng n’na Bawmwang La Raw gaw, “Ngai hpe je bat hpyen No. 1 nga yang, Myen gaw No gade rai na kun, ngai hpe sat kau lu, shamyit kau lu yang gaw Shanglawt lu na sai…Nye hkum ngai pi sat si mayu ai, ti nang hkrai si mat tim Shanglawt she lu na nga yang gaw,” ngu The Kachin Post de tsun wa ai.
KIO hku n’na n’dai hku tsun ai lam ni gaw KIO a mung masa n-sa sa na lam hpa n nga mat sai majaw tsun ai re hpe Bawmwang La Raw mu mada ai lam tsun wa ai. “Ngai hpe dai hku shara na mung bungli dai ngut na n re,” ngu Bawmwang La Raw matut tsun wa ai. “Hpa majaw nga yang tinang hkawm ai policy nan n jaw yang, jaw hkra n hkawm yang, mung shawa hpe dai hku n woi lu yang, marai langai hpe sha jahpoi n’na n’dai problem hpe solve lu galaw na n re.”
Dai re majaw n’dai mang hkang ni hpe hparan kau lu na matu shawa zuphpawng lawan shaga n’na, shada chye na shut ai lam ni hpe mung shawa a man hta hpyan dan ra ai lam Bawmwang La Raw tsun wa ai. “Ngai galaw sa wa ai ma hkra hpe mung shawa je yang u ga, dai hpe e je bat hpyen nga yang mung ngai ari hkam la na.”
