Mung Shawa Ra Sharawg ai KIO, KIA Byin hkra Galaw na Ngu Lasang Awng Wa Tsun

The Kachin Post

June 29, 2004 — New Democratic Army-Kachin, NDA-K, Ginjaw Pang Wa mare kaw nga let shamu shamawt nga ai Du Kaba Lasang Awng Wa gaw mung shawa ra sharawng ai Wunpawng Mungdan Shanglawt Hpung hte Hpyen Dap, KIO hte KIA, byin tai wa hkra shakut sa wa na lam tsun wa ai.

“Anhte gaw mung shawa, dap shawa ra sharawng ai, mung shawa hpe akyu ara jaw lu ai, mung shawa gawng malai tai ai, anhte Wunpawng myusha ni shawng lam hte Mungkan a man dan dawng wa lu ai, greng grak ai amyu langai byin hkra woi awn sa wa ai KIO, KIA byin hkra galaw na,” ngu Du Kaba Lasang Awng Wa The Kachin Post de tsun dan wa ai.

Du Kaba Lasang Awng Wa gaw NDA-K Ningbaw Du Kaba Zahkung Ting Ying garum la ai hte maren Pang Wa mare de May shata hta du nga ai rai n’na, ya ten hta ramma marai 800 daram hte hpyen dap shara langai la let shamu shamawt nga ai rai nga ai. N’dai masing hta January mang hkang a majaw rim hkrum n’na bai dat wa ai Du Kaba Padip Gam Awng hte Sara Doi La ni mung shang lawm nga sai rai nga ai.

N’dai masing hta shawa salang ni law law shang lawm ai hpaji jaw Lahta Tsang Mung Shawa Council (Superior Public Council) ngu ai hpe mung hpaw da sai lam chye lu ai.

Du Kaba Lasang Awng Wa tsun ai hku rai yang, shi galaw sa wa ai masing gaw dai ning na laman hta byin pru wa na lam, KIO, KIA hpe hka garan na matu galaw ai n re lam hte, KIO, KIA mying langai hte sha shamu shamawt sa wa na lam chye lu ai. “Anhte gaw KIO, KIA sha rai n’na, mung shawa ra ai hpe galaw ga ngu n’na, yawng hpe e kahkyin gumdin ai, machye machyang jaw ai, jasu sharawt ai dai she re.”

NDA-K hku n’na Du Kaba Lasang Awng Wa ni hpung hpe lu na, sha na, bu hpun na hte ra ai tsi mawan ni yawng hpe garum shingtau nga ai lam chye lu ai.

Raitim, KIO Ginjaw (Pajau Bum) hku na gaw Du Kaba Lasang Awng Wa woi galaw nga ai lam ni hpe n madi shadaw na matu matsun da nga ai. “Salang Lasang Awng Wa ni hkrup mara, maru marang nga n’na shiga shabra, laika shabra re lam ni hpe sung sung n sawn yu ai kam shut jang amyu sha ni a matu sum machyi kaba byin wa na hte, labau tara hkam ni rai wa na re,” ngu KIO Ginjaw Committee kawn June 23 ya hta shapraw ai n’dau shabra laika hta ka da nga ai.

Gara hku mi raitim, Du Kaba Lasang Awng Wa gaw aten du yang mung shawa ni sha daw dan wa na re lam tsun wa ai. “Mung shawa mahtang lapran kaw e Tara Agyi bai tai n’na, shanhte gaw gap da ai[KIO, KIA] hpe shanhte bai garam na ngu kam ai.”