Sara Doi La Pang Wa Du

The Kachin Post

June 28, 2004 — January shata Wunpawng Mungdan Shanglawt Hpung, KIO, ginjaw hta byin ai mang hkang a majaw rim da hkrum ai kaw na bai dat wa ai Laiza mare na Hkalup Hpung Up Sara Doi La gaw New Democratic Army-Kachin, NDA-K, ginjaw Pang Wa mare kaw du nga sai lam chye lu ai.

“Ya ngai Pang Wa kaw du nga sai,” ngu Sara Doi La Pang Wa kaw na Telephone hte The Kachin Post de tsun dan wa ai. Sara Doi La gaw June 21 ya hta Miwa Gumsan mung de hprawng shang wa ai rai n’na June 26 ya hta Pang Wa kaw du wa sai rai nga ai.

Sara Doi La gaw Laiza mare Nawng E Hku Buga Hpung a Hpung Up langai rai n’na January 15 ya kawn KIO ginjaw hta rim da hkrum ai rai nga ai. Shi hpe KIO hku n’na Ginjaw mang hkang hta ahkyak ai shara hta shanglawn ai wa re ngu masat ai majaw rim da ai rai nga ai. Raitim, Sara Doi La gaw Hpung magam gun langai re majaw KIO hku n’na tara jeyang ai lam n galaw ai sha, Jinghpaw Wunpawng Hkalup Hpung Ginjaw, KBC, hku na daw dan ya na matu tang shawn da ai rai nga ai.

Sara Doi La hpe May shata 27 ya hta rim da ai kaw na dat sai raitim, Laiza mare kaw nga na ahkang n jaw ai rai nga ai. Shi hpe Gara Yang hte Nam San Yang mare lapran na shara langai hta nga shangun da n’na, gara de mung n mai pru hkawm na hku matsun da ai rai nga ai. Sara Doi La tsun ai hku rai yang, dai shara kaw gaw shi matu shim lam n kaja ai majaw Miwa Gumsan mung de hprawng shang mat ai re lam chye lu ai. “Ngai hpe sat na matu grai lang gyam ma ai.”

Sara Doi La gaw ya ten hta Du Kaba Lasang Awng Wa ni hte rau tengman ai hte mungshawa ra sharwng ai mung masa lam galaw na matu sa du ai re lam tsun wa ai. KIO ginjaw hta shi hte rau rim da hkrum ai Du Kaba Padip Gam Awng mung Pang Wa kaw du nga n’na rau rai nga ai lam shi matut tsun dan wa ai. “Mung shawa daw dan ai hku hkan sa n’na, mung masa galaw sa wa na re” ngu Sara Doi La tsun dan wa ai.

NDA-K ni hku n’na Sara Doi La hte Du Kaba Lasang Awng Wa ni a hpung hpe ra ai lam ma hkra garum nga ai hte, nga na ginra mung jaw da ai lam chye lu ai. Du Kaba Lasang Awng Wa gaw May shata praw hta Pang Wa de du shang wa ai rai nga ai.