KBC Pastors’ Conference Galaw

Malihkrang Uma/ Myitkyina

June 25, 2004 — Jinghpaw Wunpawng Hkalup Hpung Ginjaw, KBC, a Pastors' Conference hpe Myitkyina mare Behtela Nawku Jawng kaw June 21-27 laman galaw nga ai rai nga ai.

N’dai sharin hpawng hta America mung Bethlehem Baptist Church kaw na Sasana Sara marai 7 sa du sharin ya ai rai nga ai. Bethlehem Baptist Church gaw Sara Kaba Dr. Ola Hanson (Jinghpaw Chyum Laika gale ai wa) a Nawku Hpung rai n’na, KBC hte ya du hkra matut mahkai nga ai Nawku Hpung rai nga ai. N’dai Sasana Sara ni gaw maning kawn KBC de dat ya let, n’dai zawn Pastors’ Conference hkan e lakjet jaw na matu laksan sa du ya ai ni rai nga ai.

“Shi A Mauhpa Amu Nlang Hte Hkai Dan Mu” ngu ai ga baw hte sharing hpawng hpe galaw ai rai n’na, Hpung woi ni gara hku Chyum Mungga hpe woi awn hkaja ai ladat (Inductive Bible Study Methods), Nawku Hpung gaw gara hku kabu gara shiga hkaw tsun Sasana galaw ra ai lam (Evangelism and Mission for Church Growth), Hpung woi ni Hpung hpe gara hku woi awn na lam (Pastoral Care Issues) hte Nawku Hpung a nawku dawjau ai lam (Worship for Church Growth) ni hte seng n’na sharing bawng bang nga ai rai nga ai.

Dai ning na sharin hpawng gaw Yehowa Karai Kasang a mau hpa amu hpe hkaw tsun hkai dan, shabrawng, shachyam shabra ai Nawku Hpung ni rai wa na hte, Nawku Hpung hpe Karai Kasang a myit du myit dik ai de du wa lu hkra woi awn ai Hpung woi magam gun ni law law pru wa na hpe myit mada yaw shada let galaw ai rai nga ai.

Maning na KBC Pastors’ Conference hpe KBC ginjaw hku woi awn let Geis Masat Htingnu (Mare Hpung) kaw galaw ai rai n’na, dai ning na gaw KBC Myitkyina Ginwang hku woi awn let KBC mungkan ting na Hpung Sara/Saranum ni sa du sharin lawm ai hpe mu lu ais.

Bethlehem Baptist Church gaw Mungkan shara shagu de Sasana Sara ni dat let Sasana galaw nga ai Nawku Hpung langai mung rai n’na, America Mungdan kata e mung Bethlehem Nawku Hpung kawn shangai shalat da ai Nawku Hpung ni law law rai nga ai.