National Convention hta Ceasefire Hpung ni hpe Sai Garan Nga

The Kachin Post

June 24, 2004 — Nyaunghnapin kaw galaw nga ai National Convention hta shang lawm nga ai myusha gap hkat jahkring (ceasefire) hpung ni hpe mani kaw n’na hpung langai hpra garan let National Convention Convening Commission, NCCC, hku n’na shaga jahkrum nga ai lam, zuphpawng malawm langai tsun wa ai.

June 23 ya hta National Convention Convening Commission gaw Kayan New Land Party na dat kasa ni hpe shawng ning nan lang hku n’na shaga bawng ban ai lam, hte matut n’na ceasefire hpung langai hpang langai hpe lak san hkrum mat wan a lam chye lu ai. Wunpawng Mungdan Shanglawt Hpung, KIO, na dat kasa ni gaw n’dai ladat hte seng n’na grai maja nga ai lam mung chye lu ai.

“Ceasefire hpung ni hpe garan mayu ai majaw galaw ai re,” ngu National Convention lung nga ai ceasefire hpung langai na dat kasa langai Nyaunghnapin kaw na Satellite Phone hte The Kachin Post de tsun dan wa ai. Myen Hpyen Atsuya gaw ceasefire hpung 13 jawm n’na tang shawng da ai lam ni hpe n hkap la mayu ai majaw n’dai hku galaw ai re lam, shi matut tsun wa ai.

Ceasefire hpung 13 gaw shanhte jawm bawng ban myit hkrum da ai lam ni hpe NCCC de laiwa sai bat kawn tang madun da sai rai nga ai. Dai tang madun da ai lam ni hta Myen hpyen du ni hku n’na hkap la na matu n mai byi ai lam law law hpe tang madun da ai rai nga ai.

NC dat kasa tsun ai hku rai yang, Myen hpyen du ni hku n’na gara hku sai garan ai raitim, ceasefire hpung ni hku n’na n’sen langai sha le na matu tau hkrau n’na jahkrup da sai re lam chye lu ai.

Ceasefire hte lak nak jahkrat hpung 28 na dat kasa ni hte ceasefire lapran salang ni yawng marai 105 gaw National Convention de “Laksan Saw Shaga ai Dat Kasa hte Salang ni” ngu ai ga baw mying hte shang lawm ai rai nga ai.