Lasang Awng Wa Shamu Shamawt Nga

The Kachin Post

June 21, 2004 — Wunpawng Mungdan Shanlawt Hpung KIO Ginjaw hta byin ai manghkang a majaw koi yen mat wa ai Du Kaba Lasang Awng Wa gaw n’dai shata praw hta Miwa Gumsan mung Ruili mare hta zuphpawng langai galaw ai lam, Wunpawng Mungdan Shanglawt Hpyen Dap, KIA, shiga hku chye lu ai.

June shata 6 hte 7 ya hta galaw ai zuphpawng hta Du Kaba Lasang Awng Wa hte rau New Democratic Army-Kachin, NDA-K, ningbaw Du Kaba Zahkung Ting Ying, Kachin Defense Army, KDA, na Du Kaba ni hte United Wa State Army, UWSA, kaw na maigan kithkai Salang langai mi shang lawm ai zuphpawng langai galaw ai lam, KIA hpyen du langai tsun wa ai.

KIA hpyen du tsun ai hku rai yang, dai zuphpawng hta hpa baw ni bawng ban ai lam n chye lu ai raitim Lasang Awng Wa hku n’na masha ni shaga mahkawng nga ai lam chye lu ai. “Ya shanhte training hpaw taw nga ai nga na ai,” ngu tsun wa ai. Ya ten hta Lasang Awng Wa a masha marai 120 daram nga ai hte, ra ai lam ni hpe NDA-K ni garum taw nga ai lam chye lu ai.

N’dai lam hte seng n’na KIO ningbaw ni naw jahkrup nga ai lam hte gara hku galaw na ngu ai mahtai n pru shi ai lam chye lu ai. “Ya mung dai Lasang Wa rai n’na “K” langai bai hpaw shajan dat n’na hpa lak lai ai lam lu na n re,” ngu KIO Ninggawn Amu Madu Du Kaba Gunhtang Gam Shawng tsun wa ai.

Lasang Awng Wa a shamu shamawt wa ai lam a majaw Wunpawng myusha ni dumbri dumbra rai n’na, n’gun n rawng wa na maga de rai wa na hpe tsang ai majaw, KIO gaw Miwa mung ga jarit mayan nga Kanu Kawa ni hte Dap shawa ni hpe n mai myit shut ai lam tsun hparan dan sai lam chye lu ai.

KIO Myusha Shimlam Dap Ningbaw Usa Lasang Awng Wa gaw January shata praw hta byin ai manghkang a majaw koi yen mat rai n’na, May shata praw hta NDA-K Ginjaw Pang Wa mare de sa du nga ai rai nga ai.