National Convention hte Seng ai Zuphpawng Laiza kaw Galaw

The Kachin Post

June 18, 2004 — Wunpawng Mungdan Shanglawt Hpung KIO gaw Myen Hpyen Atsuya woi galaw nga ai National Convention hte seng ai zuphpawng hpe Laiza mare kaw galaw ai lam KIO Ninggawn Amu Madu tsun wa ai.

N’dai zuphpawng hpe June 17 ya hta KIO ginjaw committee malawm ni sha hkrum zup galaw ai rai n’na, Yangon mare na bai du wa ai KIO Ningtau Ningbaw Du kaba Gauri Zau Seng hte KIO Maigan Kithkai Lit Hkam Du Kaba Dr. La Ja ni gaw National Convention hta jahkrup bawng ban da ai lam ni hpe sang lang dan ai lam chye lu ai. N’dai Du Kaba 2 gaw Laiza de June 16 ya shani du wa ai rai nga ai.

KIO hku n’na ra ai lam ni hpe National Convention hta tang madun da sai lam hte, dai tang madun da ai lam ni hpe Myen Hpyen Atsuya ni hku n’na mahtai htang wa ai masa hta hkan n’na she ahkyak la let galaw sa wa na re lam, mani na zuphpawng hta shang lawm ai KIO Ninggawn Amu Madu Du Kaba Gunhtang Gam Shawng tsun wa ai. “Ya ten gaw hpa mung daw dan na n rawng shi ai.”

KIO Tingnyang-up malai 2 Dr. Tu Ja woi awn ai National Convention dat kasa hpung gaw Yangon mare de laiwa sai May 7 ya kawn du nga n’na, ya ten du hkra Nyaunghnapin kaw galaw nga ai National Convention hta shang lawm nga ai rai nga ai. Du kaba Gauri Zau Seng hte Du Kaba Dr. La Ja ni mung dai dat kasa ni hte rau yu wa n’na Yangon KIO rung kaw sa du nga let dat kasa ni hte ni kahtep ai hku bawng ban jahkrup galaw sa wa ai lam chye lu ai.