Ma Masat Laban Shatapru Buga Hpung hta Galaw

The Kachin Post

June 17, 2004 — Myitkyina mare Shatapru Buga Hpung kaw laiwa sai Laban shani hta galaw ai Ma Masat Laban hta Ma marai 1800 daram shang lawm ai lam Buga Hpung shiga hku chye lu ai.

Shatapru Buga Hpung Ma Masat Laban shani hta nawku lamang lahkawng lang galaw ai rai n’na, dai jahpawt daw lahkawng lang hta Ma ni nan woi awn n’na nawku ai lam chye lu ai. N’dai Ma ni a n’htoi hta Shatapru buga hpung na ma ni sha n nga kaga hpung na Ma ni mung sa du shanglawm ma ai rai nga ai. Shatapru Buga Hpung gaw Laban n’htoi hta masum lang nawku ku ai rai nga ai.

“Ma ni grai law ai majaw anhte pyi she mau mat ai, Kanu Kawa ni, hte Hpung salang ni mung grai mau ma ai,” ngu Shatapru Buga Hpung na Sara Hkalen Tu Hkawng tsun wa ai.

Sara Tu Hkawng tsun ai hku rai yang, Ma Masat Laban galaw ya ai lachyum gaw anhte a prat ningnan pratpra ai nli ni hpe shinggyim uhpawng de jashawn la n’na, shanhte hpe masha kaba zawn shatai let, myit masa shatsaw ya ai lam re lam, myu tsaw, mung tsaw, Buga Hpung hpe tsawra ai myit ni rawng let, hpang de, gara shara kaw du tim, adum nga na matu hte Ma ni a lam hpe Salang ni hku n’na alak mi myit ya let, Ma ni hpe shara jaw, aten jaw chye wa na matu shadum ai lam chye lu ai.

Shatapru Buga Hpung hku n’na Ma Masat Laban hpe Buga Hpung a Sasana magam langai hku yaw shada let shaning shagu lu galaw hkra masing jahkrat da ai lam chye lu ai.

Shatapru Buga Hpung hta n’dai zawn rai Ma Masat Laban hpe laiwa sai 5 ning kawn galaw hpang sai rai nga ai.