Mali Hka Madim Galaw ai hpe Ninghkap na Lam KIO Tsun

The Kachin Post

June 16, 2004 — Myen Hpyen Atsuya hte Japan company langai hku n’na Jinghpaw mung Mali-N’mai Hka Zup lawu hta Madim kaba gap na matu teng wa ai rai yang, Wunpawng Mungdan Shanglawt Hpung KIO gaw ninghkap sa wa na lam chye lu ai.

Myen Hpyen Atsuya hku n’na Mali-N’mai Hka Zup lawu deng 3 tsan ai shara hta megawatt 3,100 lu shapraw ai Madim kaba gaw gap na matu laiwa sai April 27 ya hta masing jahkrat sai lam, New Light of Myanmar shi laika hku chye lu ai. N’dai masing hpe “Ayeyawady Myitsone Project” ngu shaming ai rai n’na, Myen Hpyen Atsuya a mung dan ting hta galaw sa wa na yaw da ai Myihprap Wan shapraw na masing law law kaw na langai rai nga ai.

“Ninghkap na re,” ngu KIO Ninggawn Amu Madu Du Kaba Gunhtang Gam Shawng tsun wa ai. “Anhte KIO hku n’na n hkap la lu ai, dai daram mung shawa machyi wa na rai yang.”

Mali Hka Madim galaw ngut mat ai rai yang, Tang Hpre mare lahta nga mare 30 jan na n’ta hting gaw 5,000 gaw hka kata de lup mat na rai n’na, mare masha 8,000 daram gaw nga shara mat mat na re lam chye lu ai. Ngut n’na Hkai Sun acre 18,000 hte dai grupyin na Hpun Kawa hte Nam nga N’hprang sut rai ni hten za mat na rai nga ai. Grau n’na gaw anhte Jinghpaw Wunpawng myusha ni a masin salum ngu masat mai ai shara Mali-N’mai Hka Zup hte dai shara hta gaw gap da ai “Nu Maria Lungpu” zawn re ai makam masham hte seng ai shara ni mung hten za mat na rai nga ai. Mali-N’mai Zup gaw Hka n’gun bung ai Hka lahkawng wa zup ai shara re majaw mungkan hta nau tam n mu lu ai shara langai mung rai nga ai.

Du Kaba Gam Shawng matut tsun ai hku raiyang, KIO sha n’ga New Democratic Army-Kachin NDA-K ni mung n hkap la mayu ai lam chye lu ai. N’dai lam hte seng n’na, KIO gaw tara shang Myen Hpyen Atsuya hpang de ninghkap ai lam n nga shi ai raitim, Mali Hka Madim kaja wa galaw teng wa yang gaw ninghkap sa wa re lam chye lu ai.

N’dai Mali Hka Madim galaw na hpe n ra sharawng ai Tang Hpre mare grupyin na mare 30 jan na Salang marai 50 daram ta masat mahkret let, Myen Hpyen Atsuya, KIO hte NDA-K ni hpang de 2004 ning February 1 ya n’htoi hte ninghkap ai lam tang shawn da sai rai nga ai.

N’dai lam hte seng n’na Myitkyina na ramma langai tsun ai hku rai yang, mare masha ni a ninghkap ai laika a kanan (copy) ni hpe KIO hte NDA-K ni hpe jaw da sai rai n’na, dai uhpung ni hpe mung ninghkap lawm na matu saw shaga da ai rai nga ai. “NDA-K, KIO hte kaga ni gaw n ra sharawng ai lam lek mat htu ai lam garai n nga shi ai,” ngu Myitkyina na ramma tsun wa ai. “Mare masha ni gaw n ra sharawng ai re.”

Dai masing hpe Kansai ngu ai Japan company hku n’na shadawn shakyang ai lam galaw ngut sai lam chye lu ai.

Mali Hka Madim gaw Sam mung na Sak Hkung Hka (Salween River) hta gaw gap na hkyen nga ai Tasang Madim ngut yang Myen mung hta kaba htum ai rai nga ai.