Cigarette Jak Rung Maija Yang kaw Gaw Gap Nga

The Kachin Post

June 15, 2004 — Cigarette jak rung ningnan langai hpe Jinghpaw mung Maija Yang mare hta Miwa mung na Sut du langai gaw gap nga ai lam, mare shiga lawk hku chye lu ai.

N’dai jak rung ningnan hpe gaw Miwa Gumsan Mungdan Ruili mare nga Laching ngu ai wa a arang hte gaw gap nga ai rai nga ai. Laching gaw Miwa mung nga Jinghpaw myusha langai rai n’na Ruili mare hta Ching Cheing Hotle madu mung rai nga ai. Dai Hotel gaw Ruili mare hta kaba htum ai rai n’na Four Star madang nga ai Hotel rai nga ai.

“Ya langai bai galaw hpang wa nga ai, n’dai Maija Yang mare kata kaw sha re,” ngu mare masha langai tsun wa ai. “Foundation ni jahkrat n’na concrete ni hte, wut ni hte sharawt taw nga ai.”

Dai Cigarette jak rung galaw nga ai shara gaw tsawm ra kaba ai hte dai wang kata kaw Hpai da n’ta ni mung gaw gap nga ai lam chye lu ai.

Maija Yang mare hta Miwa ni a Cigarette jak rung kaga langai mung naw nga ai rai nga ai. Dai jak rung kaw na ‘Nam Pan Hkat Mi’ ngu ai mying hte Cigarette htuk shapraw nga ai rai nga ai. Wunpawng Mungdan Shanglawt Hpung KIO gaw dai jak rung matu shap ya ai lamu ga shabrai lu la ai lam chye lu ai.