Maija Yang Hpai Da Dabang hta Miwa Langai Sat Hkrum

The Kachin Post

June 14, 2004 — Jinghpaw mung hte Miwa Gumsan mungdan ga jarit makau nga Maija Yang mare kaw hpaw da ai Hpai da dabang (Casino) hta Miwa langai sat katut ai lam, mare masha langai tsun wa ai.

Sat hkrum ai masha gaw Miwa num langai rai n’na June 12 shana hta sat katut ai re lam hte, shi a mang hpe gaw hpang jahpawt hta she mu ai lam chye lu ai.

“Num langai hpe galun sat da ma ai,” ngu Mying n tsun ai Maija Yang mare masha tsun wa ai.

Mare masha tsun dan ai hku rai yang, sat katut ai Miwa num wa a madu wa gaw Hpai dang n’na wa mat ai majaw shana lam kaw hkap n’na galun sat kau ai re lam tsun wa ai. Raitim, gadai sat ai hpe ya ten du hkra n chye shi ai lam, matut tsun dan wa ai.

N’dai manghkang hte seng n’na Miwa mung masha re ai majaw Miwa Atsuya ni hte jahkrup n’na hparan nga ai lam chye lu ai. Lai wa sai ten hta mung Maija Yang Hpai da dabang hta sat hkrum ai masha 3-4 daram re sai lam chye lu ai.

Maija Yang Hpai da dabang gaw Wunpawng Mungdan Shanglawt Hpung KIO kawn hpaga la ni hpe Hpai da dabang hpaw na matu ahkang jaw da ai shara rai nga ai. Miwa hte Myen mung na hpaga la ni law law gaw dai Hpai da dabang hta arang bang n’na hpaga ga nga ai rai nga ai.