Jinghpaw Mare na Ma Shalat Jawng Sarama Rim Kautut

The Kachin Post

June 4, 2004 — Thai Mungdan na Jinghpaw mare kaw Ma Shalat jawng hpaw let Ma ni hpe shalat ya nga ai Sarama langai shada da shawk hkat ai majaw Thai Pyada ni a rim katut ai lam, mare masha ni tsun dan wa ai.

Ma Shalat jawng Sarama Sumhpawng Ja Nan (ma hkum shata 7) hte marai 4 gaw mani hking 12 ten hta Chiang Dao Mare hta hpaw da ai Computer sharin jawng hta Thai pyada ni sa rim la ai rai nga ai. Shan hte marai 5 hpe gaw Thai mung dan hta tara n shang ai hku sa nga lam hte seng n’na je yang ma ai lam chye lu ai. Chiang Dao mare gaw Chiang Mai mare kaw na deng 40 tsan n’na, dai kaw na deng 30 sa yang Myen mung hte Thai mung ga jarit na Jinghpaw mare Ban Mai du ai rai nga ai.

Sarama Ja Nan hpe rim na matu pyada ni hpe shawk ai ni gaw dai mare na Nangzing Naw Lawn hte Ja Tai Pan ni re ai lam, Ningtau Mare Salang Lashi Gun Wa tsun wa ai. “Sarama a Project hpe manawn ai majaw re.” N’dai manghkang hte seng n’na mare salang ni bawng ban nga ai lam mung chye lu ai.

Mare masha ni hku n’na mung Sarama Ja Nan woi galaw nga ai mai kaja ai bungli ni hpe dingbai dingna jaw ya ai ni hpe grai myit n gut nga ma ai lam mare Salang Gun Wa tsun dan wa ai. “Myusha shada ai n’dai hku di ai gaw n kaja ai, anhte sharin shaga na re.”

Sarama Ja Nan gaw Catholic Sasana Maryknoll Mission a madi shadaw ai n pu hta Ma Shalat jawng, Computer sharin jawng, mare na ma ni hpe jawng lung shabrai htawk ya ai lam hte mare na Nu Num ni hpe Ka wa dut let shang gumhpraw tam ai lam ni hpe woi galaw nga ai rai nga ai.

Sarama Ja Nan gaw lai wa sai 4 ning daram kaw n’na Jinghpaw mare Ban Mai sa shanu nga ai rai nga ai. Shawng de shi gaw Philippine mungdan Quezon mare na Radio Veritas Asia a Jinghpaw hku n’sen shapoi dap hta 5 ning magam gun wa ai shayi langai rai nga ai.

Laiwa sai December shata mare na Hkalup Hpung Nawku Jawng dingshawn shang poi hta mung, dai kaw jaw sha ai lu sha a majaw marai 400 jan gaw againg agang kan machyi ai lam byin wa sai rai nga ai.