Ara La a Hka Wa na Matu Jinghpaw Sut Du ni Kin nga

The Kachin Post

June 1, 2004 — Wunpawng Mungdan Shanglawt Hpung KIO a sut gumhpraw ni hpe tinang a Hpaga lam hta jai lang kau ai majaw laiwa sai ten hta rim jep hkrum ai Salang Ara La a hka ni hpe bai wa na matu shi hpe lit hkam shaw la ya ai Jinghpaw Sut Du ni kin nga ai lam shanhte hte ni nawn ai shiga lawk hku chye lu ai.

N’dai lam hte seng n’na N’mai Hka Drinking Water Company madu Sut Du N’sang Tu Awng gaw Miwa Gumsan mung de du nga n’na, Ara La a KIO de jaw ra ai Miwa gumhpraw Sen 73 jan (US $ 881,000) hpe wa kau lu na matu lajang nga ai lam shi hte ni nawn ai Salang langai tusn wa ai.

Ara La gaw 2004 ning January shata KIO Ginjaw hta manghkang byin ai laman hprawng mat ai majaw shi hpe lit hkam da ai Sut Du Yup Zau Hkawng, Sut Du N’sang Tu Awng hte Laiza mare na Sara Maran Naw (Nga Mai Naw) ni gaw shanhte a ga sadi hte maren KIO hpe Miwa gumhpraw seng 73 wa ra na rai nga ai.

N’sang Tu Awng, Yup Zau Hkawng hte Laiza mare na Sara Maran Naw ni gaw Ara La hpe rim da ai kaw na dat ya na matu lit hkam hpyi lajin ai majaw 2003 ning October shata hta dat ya n’na, KIO Ginjaw hta nga shangun da ai rai nga ai.

Ara La gaw 2001 ning htum wa ai ten hta KIO a sut rai ni hpe shi a tinggyeng a matu lang kau ai lam ni hte seng n’na jep sagawn na matu KIO Ginjaw hta rim da hkrum ai rai nga ai. Laning mi jan rim jep da ai kaw n’na 2003 ning October shata hta bai dat wa ai rai nga ai. De hpang shi gaw January shata praw hta Ginjaw kaw byin ai manghkang laman Du Kaba Lasang Awng Wa ni hte rau Miwa Gumsan mung de hprawng mat ai rai nga ai.

“Shi n’dai anhte Uhpung Uhpawng KIO a gumhpraw hpe shi gaw jahpan masu amyu myu rai n’na kajam shamat kau rai…Miwa gumhpraw Sen 73 jan re hpe shi ma hkra jai htai lai kau ai,” ngu KIO Ninggawn Amu Madu Du Kaba Gunhtang Gam Shawng tsun wa ai. “Dai hpe wa ra ai.”

Sut Du ni ga sadi jaw da ai gaw lama Ara La hprang mat ai rai yang shanhte a sut rai ni rai nga ai Jade Land Myanmar Co., Ltd hte N’mai Hka Drinking Water Company (Myen gumhpraw Sen 2000 daram dan ai) ni hpe KIO hpang de ap ya na ngu tsun da ma ai.

Dai gumhpraw hpe 2003 ning December 31 ya hta hpang jahtum tawn n’na wa na matu masat da ai raitim n lu wa ai majaw 2004 ning February 10 ya, dai kawn hpang jahtum April 30 ya hta wa na matu KIO hku n’na masat da ai lam chye lu ai.

Raitim, April 30 ya hta mung n lu wa ai re majaw KIO hku n’na May shata praw hta Yup Zau Hkawng a Jade Land Myanmar company N’sang Tu Awng a N’mai Hka Drinking Water Company hte Laiza mare na Sara Maran Naw a N’ta ni hpe zing la da sai rai nga ai. “Raitim bai shaw la na ahkang jaw da ai,” ngu Du Kaba Gam Shawng tsun wa ai. “Gumhpraw dai bai hpai pru wa jang gaw anhte bai jaw na re.”

London Mare nga Sut Du Bawmwang La Raw tsun ai hku rai yang, 1995 ning hta KIO hpe shi hku n’na hkoi ya ai Hong Kong $ Sen 100 kaw na Ara La gaw Miwa gumhpraw Sen 60 hpe Yup Zau hkawng hpe kahtap hkoi ya ai lam chye lu ai. Yup Zau Hkawng gaw hpang de Miwa gunhpraw Sen 40 sha KIO ningbaw Usa Du Kaba Zau Mai (ya KIO Ginjaw hta nga shangun da ai) hpe bai wa ai lam chye lu ai.

Ara La gaw Du Kaba Zau Mai hte grai ni nawn ai wa rai n’na Du Kaba Zau Mai KIO ningbaw tai nga ai ten hta KIO uhpung a gumhpraw ni hpe kam ai hku jai lang shamat kau ai lam chye lu ai.

Ara La gaw Myen Mung Yangon, Mandalay, Myitkyina mare hkan N’ta ni mari da ai sha n ga, Miwa Gumsan mung hta mung shi gaw gap da ai N’ta hte Hotel ni nga ai lam chye lu ai. KIO gaw shi a Yangon mare Bogyoke Ywa na N’ta hpe zing la kau sai rai nga ai. Ara La gaw Miwa gunhpraw Sen 600 daram dan ai Shamu Hpun (Miwa ni mang makoi ai hta lang ai Hpun) sun madu mung rai nga ai.