The Kachin Post

Hka Lim Masat Masa Sumla Gayet ai Wa hpe Rim Jep

The Kachin Post

July 30, 2004 — Myitkyina mare hta Mali Hka kaba ai lam ni hpe masat masa sumla gayet n’na shabra ai wa hpe Myen Atsuya magam gun ni gaw rim da n’na san jep nga ai lam, Myitkyina mare masha ni tsun dan wa ai.

Lazing La Htoi, Myitkyina mare na Htoi San Htangdip jak madu, gaw n’dai bat July 27 ya hta rim shaga la n’na, shi shabra da ai video compact disc, VCD, ni hpe bai zing kahkin la na matu matsun da ai lam chye lu ai. Dai VCD galaw shapraw ai Cyber Computer Centre hpe mung pat kau ya ai rai nga ai.

Laiwa sai bat hta Myitkyina mare hta Mali Hka kaba wa ai majaw masha n’kau mi si n’na Myitkyina mare hte grupyin hkan na n’ta n law htum 5,000 daram hten mat ai hte mung shawa law law jam jau nga ai rai nga ai.

Lazing La Htoi gaw Myitkyina ginwang Jinghpaw Wunpawng Hkalup Hpung, KBC, hte rau VCD 300 galaw shabra ai rai nga ai rai n’na, VCD langai mi hpe Myen gumhpraw Kyat 1,000 hte dut ai rai nga ai. Ya ten hta VCD 200 daram hpe bai lahkawn lu sai lam mung chye lu ai. N’dai VCD gaw Myitkyina mare Hka lim nga ai lam hte dai ten hta KBC ramma ni Hka lim tsinyam ni hpe garum la nga ai lam ni hpe masing gayet dai ai rai nga ai.

VCD gayet shabra ai lam hte seng n’na Myitkyina ginwang KBC Amu Madu Rev Hkalam Samson hte makam masham ningbaw ni hpe Myen Atsuya a Jinghpaw mung daw uphkang du Maung Maung Swe gaw mani July 29 ya hta shaga la n’na san jep ai lam chye lu ai.

Myen Hpyen du ni hku n’na n’dai VCD hpe maigan de shabra na tsang ai majaw bai zing la ai re lam, KBC malawm langai tsun wa ai.

July 24 ya hta Myen Hpyen Hpyen Atsuya a Amu Madu II Thein Sein Myitkyina mare de du wa n’na Hka Lim tsinyam ni hpe hkrum shaga let, dai ni a matu garum gumhpraw Kyat wan 84 jan lahkawn ya sai lam The New Light of Myanmar shi laika hku chye lu ai.

Myen Hpyen up-hkang salang ni gaw ya ten hta Hka lim tsinyam ni hpe garum la nga ai KBC ramma ni a shara hta shanhte a masha ni rai nga ai Kyan-Hkai-Ye hte Wan Sat Dap na ni hpe shara la shangun nga ai lam, Myitkyina mare masha langai tsun wa ai.