Anhte Myushayi ni Shamu Shamawt Nga

Hkawn Nu/ Chiang Mai

July 29, 2004 – Jinghpaw Wunpawng myusha marai 76 gaw Kachin Women Association of Thailand, KWAT, kaw na woi awn galaw ai ningpawt ninghpang Upadi (Constitution) hte seng ai lam ni hpe n’dai shata praw hta sharin la lu sai lam, myushayi hpung lit hkam langai tsun wa ai.

N’dai sharin hpawng hpe Jinghpaw mung hte Miwa Gumsan mung ga jarit na Maija Yang mare hta June 23 kawn July 3 ya lapran galaw ai rai n’na, Burma Lawyer Council kaw na sharin sara Nu Nu hte Nau Lat ni hku n’na sharin ya ai lam chye lu ai.

“Mungdan kata nga, Wunpawng myusha ni gaw machye machyang hpaji lam ni hpe grai hpang gara nga ma ai, dai majaw mai byin ai daram jahkring hkring lu sharin ya yang grau kaja ai,” ngu KWAT a Jang Htung (Co-ordinator) Shirley Seng The Kachin Post de tsun wa ai.

KWAT hku na gaw n’dai zawn Jinghpaw mung kata de mung shawa ni hpe sharin hpawng law law lang galaw mayu ai raitim, Ja Gumhpraw Fund tam na naw yak ai re majaw laning mi hta 2 lang daram sha lu galaw ai lam chye lu ai.

Wunpawng Mungdan Shanglawt Hpung, KIO, ginra hkan sharin hpawng jaw ga ai Mai Ja ngu ai KWAT malawm tsun ai gaw, buga kata de sharin hpawng galaw na matu gaw Thai mung kaw galaw ai sharin hpawng ni hta Fund grau ma ai majaw Gumhpraw jaw ya ai Donor ni nau n kam jaw ai lam chye lu ai. “Buga kata de sharin hpawng ni lu galaw hkra Fund lu ra ai,” ngu Mai Ja tsun wa ai.

Dai ning laman hta Jinghapw mung kata na myushayi 3 hpe KWAT kaw ra ai lam sharin la na matu shaga da sai rai n’na shanhte hpe July shata kawn December laman nga shangun na lam, KWAT rung-up Seng Mun tsun wa ai. Dai ni hpe Computer, English, Human Rights, Law, Constitution, Federalism, Media hte kaga NGOs ni galaw ai sharin hpawng ni hta shang lawm hkaja shangun na rai nga ai.

KWAT hku na buga kata na myushayi n law htum 10 daram hpe Thai mung de lu shaga la sai rai n’na, Tsi hpaji, Shinggyim ahkaw ahkang hte kaga sharin hpawng ni law law ni hta sharin hkam la shangun sai rai nga ai. Kan bau bungli hte seng n’na Sinpraw ginwang hte Dingdung ginwang ni hta Rep-Chywi sharin ai shara 3 hpe mung lu hpaw da sai lam chye lu ai.

Thai mung dan de pru sa wa ai myushayi ni hpe garum la lu na hte shanhte a mayak manghkang ni hpe lu hparan la lu na matu KWAT hpe 1999 ning December 9 ya hta Chiang Mai mare hta hpaw hpang wa ai rai nga ai.