Hka Lim Tsinyam ni matu Metta Garum Hpyi
The Kachin Post
July 27, 2004 — Myitkyina mare kaw Hka lim mat ai majaw jamjau hkrum nga ai tsinyam masha ni hpe garum la na matu Metta Development Foundation hku n’na US $5,000 garum jaw na matu saw shaga da nga ai.
N’dai hku garum hpyi da ai lam hpe Myitkyina mare Hka lim mat ai hte seng n’na Metta kawn hta da ai jahpan hta tusn da nga ai. Metta Development Foundation gaw 1998 hta gaw de wa n’na, Myen mung hta mung shawa ni a ra ai lam ni hpe garum ya nga ai NGO hpung rai nga ai. Metta a jahpan hta Hka kaba mat ai majaw masha marai 50 daram si mat n’na Myitkyina hte makau grupyin mare hkan na n’ta 5,000 daram hten mat ai lam chye lu ai.
Hka lim mat ai marang e, lu Hka san seng ai n lu ai shara hkan kan mase a-na (Diarrhea) byin hpang wa sai re majaw tsi mawan ni hkyak hkyak ra ladawn nga ai lam chye lu ai. Ngut n’na Hka san lu na matu Hka Htung 300 jan hpe mung Hka chyup shaw san seng kau ra ai re majaw Hka chyup jak 4 ra ai lam hpyi lajin da nga ai. Hka chyup jak 4 a matu Kyat 1,000,000 ang ai rai nga ai.
Hka lim tsinyam ni hpe Metta hte rau German Catholic Bishops’ Organization for Development Cooperation (MISEREOR), Swiss Foundation for Development Cooperation (Swissaid), Medicins Du Monde (MDM) hte CORD ngu ai NGO hpung ni hku n’na garum la nga ai hte maren, Jinghpaw Wunpawng Hkalup Hpung, KBC, na ramma 70 hte Wunpawng Mungdan Shanglawt Hpung, KIO, Myitkyina kithkai rung na ni mung garum nga ai lam chye lu ai.
July 23 ya shapraw ai Myen Atsuya a Myanma Alin shi laika hta gaw, Jinghpaw mung dingdung de marang aging agang matut manoi htu ai majaw Myitkyina mare hta July 18 kaw hkrit tsang ra ai Hka masat 1,200 centimeter lai mat wa n’na 1,267 centimeter du mat ai lam chye lu ai. July 19 ya hta gaw 38 ning laman hta No 2 tsaw htum ai Hka masat 1,406 centimeter de du mat ai rai n’na July 20 ya shana de Hka bai hkrat mat ai lam tsun da nga ai.
Dai shi laika hta, Myitkyina mare hta Hka kaba mat ai raitim masha si ai hte hpa arung arai sum mat ai n nga ai ngu n’na n teng n man ai hku ka da ai hpe mu lu ai.
