Myitkyina Hkalup Ramma Gawdin Poi Hpang

Malihkrang Uma/ Myitkyina

July 18, 2004 — Myitkyina Ginwang Hkalup Ramma Dap kawn woi awn ai Lanam Gawdin Ginsup Lamang hpe laiwa sai July 15 ya hta Myitkyina mare Nyeing Chan Tar Yar Gawdin Pa kaw hpaw hpang sai rai nga ai.

Gawdin poi hpe dai shana de hking 3:00 hta hpaw hpang wa ai rai n’na, dai poi lamang hta Myitkyina Ginwang KBC Amu Madu Rev. Hkalam Sam Sun gaw mungga htawn tsun, Jinghpaw Mungdaw Atsuya Ginsup Committee ningbaw U Sein Tong hku n’na num htet ga tsun, Rev. Zahkung Lum Hkawng gaw akyu hpyi ya let Rev.Kumshin Bawk Naw a shaman ya ai hte hpungdim dat ai rai nga ai.

Masin pawt manghkang shapraw ai lam n nga ai sha, n’den ja ai myit hte atsam marai shapraw ginsup na lam, Rev. Hkalam Sam Sun gaw shi a mungga hta tsun wa ai.

N’dai ginsup poi hta ginsup hpung ni yawng 12 tup rai n’na, uhpung 4 garan let shingjawng mat na lam chye lu ai. Ginsup uhpung (A) hta Behtela, Maisak Wang, N’jang Kawng, (B) hta Shatapru, Zi-un, Behtlehem, (C) hta Manhkring, Htoi San, Mare Hpung (Geis) hte, (D) hta Du Mare, Dap Kawng, Emanuela ramma hpung ni shang lawm ginsup ai rai nga ai.

Dai shani na hpaw poi hta ginsup hpung ni hpe Jan Mai Kawng Hpung Up Rev. Lahpai Ja Naw ningshawng let, Pi Rawng Sumpi hpung ni hte rau shawng de shara la n’na, ginsup ga sadi hpe rau sha jawm tsun let, akyu hpyi hkam la ai rai nga ai. Dai hpang, shawng ningnan htawng shingjawng na Behtela hte N’jang Kawng Buga hpung ginsup ninghkring ni hpe Shayi num sha ni hku n’na nampan shagrau ai lam galaw n’htawm gawdin htawng shingjawng ai lam hpe hpang wa ai rai nga ai.

Laklai ai maka gaw, Ginsup poi n hpang shi yang, “Fair Play Please” nga ai laika hkrang hpe madun n’na, ginsup hpung ni yawng a Mying ka da ai masat-pa (signboard) hpe tinang Hkahku hking hpun da ai shayi sha ni jumlang da ai hpe mu lu ai.

Ndai Gawdin poi hpe August 7 ya hta Ninggang kashun na lam chye lu ai.