Wa Ra Bum Mayan Mawru Byin

The Kachin Post

July 8, 2004 — Jinghpaw mung sinpraw hkran Miwa Gumsan mung hte ga jarit mayan hkan n’dai bat praw hta marang nau htu ai majaw mawru byin let, n law htum masha 6 mat mat n’na Wunpawng Mungdang Shanglawt Hpyen Dap, KIA, Dap Ba 3 mung tsawm ra mi hten za mat ai lam, KIA shiga lawk hku chye lu ai.

Mawru byin hpang wa ai lam gaw July praw 4 ya shana yup tung kawn n hkring n sa marang kaba htu ai majaw July 5 ya jahpawt jau jau kaw n’na KIA Dap Ba 3 dung ai Wa Ra Bum gyi ru hpang wa n’na, makau grup yin hkan na mare ni mung mawru hta lawm mat ai rai nga ai. Marang htu ai shadawn shadang gaw (8 inches) rai n’na hking hkum 20 daram matut manoi htu mat ai majaw mawru wa ai lam chye lu ai.

“Marang nau htu na yawng gyi kapat ma sai…Wang Bum de na mung gyi hkrat, OBC kawng de na mung gyi hkrat rai majaw dai hkan na n’ta ni yawng hten ma sai,” ngu Wa Ra Bum kaw nga ai KIO Sinpraw Ginwang Amu Madu Du Kaba Nuk Dan tsun wa ai. “Hpyen dap ma grup grup yawng gyi sai…Lam ni mung yawng hten ma sai, la n mai mat sai.”

N’hkawng Pa na KIA ninghtawn rung mung mawru kaw lawm mat n’na, dai rung na magam gun Hkai Rem sara Hkun Nawng mung hkala si mat ai lam Du Kaba Nuk Dan tsun dan wa ai.

Mawru a majaw N’hkawng Pa mare, Wa Ra Yang mare, Hka Lum Pa mare ni mung ram daw hten za mat sai lam chye lu ai. N’hkawng Pa na gat sa ai mawdaw langai gyi lawm mat ai majaw mawdaw kaw lawm ai masha yawng asak sum mat ai hte, Sinlum Bum Ginwang na hkai sun sara Naw Lawn wa mung lawm mat wa sai lam chye lu ai.

Ya ten hta KIA Dap Ba 3 gaw mawru a majaw masha n mai nga hkra hten za mat sai hte, labau shang “Wang Kawng” kyu hpyi bum mung ga hkang kaba hkang mat sai lam chye lu ai. Dap Ba 3 a madum sumpyi jak arung arai ni mung yawng mawru hte lawm mat sai lam, Shanglawt Masa Gat Hkai Hpung na Lit Hkam wa tsun ai.

Ya ten hta dap shawa ni a matu nga shara dabang ni gaw gap nga sai hpe chye lu ai.