Yangon de Hpyen Man Tawn Ra ai Lam KIO Tsun
The Kachin Post
July 6, 2004 — Jinghpaw Wunpawng myusha mung masa hpung ni hku n’na shada manghkang shapru hkat nga na malai, yawng a hpyen rai nga ai Myen hpe hpyen man tawn ra ai lam Wunpawng Mungdan Shanglawt Hpung, KIO, a Ninggawn Amu Madu tsun wa ai.
“Yangon hpyen man de gaw hpa mung n di, KNO [Kachin National Organization] ni mung yu u, anhte dinghku ngu na KIO kata e hkrai shalau ya ai gaw kade lang naw shalau na,” ngu KIO Ninggawn Amu Madu Du Kaba Gunhtang Gam Shawng The Kachin Post de tsun wa ai.
England kaw nga ai KNO ningbaw Duwa Bawmwang La Raw hpe KIO a daru magam kashun la na matu grai lang shakut sai wa re ngu ai majaw KIO a je bat hpyen No. 1 ngu masat da ai rai nga ai.
“KIO a dinghku kata e hkrai shalau ai gaw, dai gaw hpa baw rai i?,” ngu Du Kaba Gam Shawng tsun wa ai. Shi matut tsun ai hta, Duwa Bawmwang La Raw gaw 2001 ning February shata KIO Ginjaw daru magam zing la lam a shawng kawn daru magam zingla na matu 2, 3 lang shakut sai lam chye lu ai. Duwa Bawmwang La Raw gaw 2004 ning January shata praw hta KIO Ginjaw hta byin ai manghkang hta mung shanglawm shamu shamawt wa ai rai nga ai.
“Ya du hkra kahtap na galaw, kahtap na galaw ai gaw, shi a myutsaw myit gaw taw hpa baw de gale na i?... Gade lang naw anhte KIO Ginjaw hpe naw gram na i?,” ngu Du Kaba Gam Shawng tusn wa ai.
Du Kaba Gam Shawng tsun ai hku rai yang, KIO Ginjaw Du ni gaw mung masa, hpyen masa lam ni hta mahkrum madup law law nga sai ni re ai hte, lai wa sai ten na rawtmalan prat, anhte myusha ni n hkap lu ai Communist laru kata kaw na pi lawt lu hkra shakut wa sai lam tsun wa ai. “Anhte mung manya mung n re gaw,” ngu Du Kaba Gam Shawng tsun wa ai.
Anhte myusha mung masa hpung ni langai hpang langai ga garan nga ai lam hte seng n’na Myen ni gaw kabu na re lam, Du Kaba Gam Shawng tsun wa ai. Lai wa sai ten hta Du Kaba Zahkung Ting Ying woi awn ai New Democratic Army-Kachin, NDA-K, hte Du Kaba Mahtu Naw ningbaw ai Kachin Defense Army, KDA, hpung ni garan pru ai shaloi Myen hpyen du ni kalang ta hkap la shara jaw ai rai nga ai. “Ya Lasang wa [Du Kaba Lasang Awng Wa] ‘K’ langai mi hpaw dat tim Myen ni gaw masat masa galaw gaw e,” ngu Du Kaba Gam Shawng tsun wa ai.
