Japan na Jinghpaw Wunpawng Nawku Hpung 12 Ning Hpring Poi Hkyen Lajang

The Kachin Post

July 2, 2004 — Japan mung Tokyo mare na Jinghpaw Wunpawng Hkristan Ganawn Mazum Nawku Hpung (Kachin Christian Fellowship, KCF) a 12 ning ladu hkrum masat poi hpe July 11 ya hta galaw na lam chye lu ai.

N’dai poi galaw ai majaw “KCF Nawku Hpung masha ni myit n’ngun bai ja wa ai hte gahkyin gumdin lam grau bai lu la wa na myit mada ai,” ngu KCF Amu Madu Htawshe Hawng Hkawng tsun wa ai. “Mungkan shara shagu na Chyurum Wunpawng sha ni yawng mung myit dum ai hte akyu hpyi ya na hpe kam ai.”

Dai poi hta Rev. Dr. La Wu hpe Nawku Hpung ningnan gaw de ya wa ai wa re majaw lak san Myen mung kaw na shaga la let chyeju shakawn nawku hpe woi awn na matu masat da ai lam chye lu ai. N’dai poi a matu Japan nga anhte myusha ni gaw makam masham Hpung n bung hkat tim yawng gaw myit lawm ai hte jawm hkyen lajang nga ai lam chye lu ai.

Poi hta jai lang na matu yaw da ai Gumhpraw (budget) gaw US $4,000 rai n’na, dai hpe KCF alu kaw na n jai ai sha, Hpung masha ni garan lit la na lam chye lu ai.

N’dai zawn rai chyeju shakawn nawku hpawng hpe lu galaw ai majaw, anhte myusha Sut Du ni law jat wa n’na anhte myusha ni madu ai Company ni law wa na hte hpaji hkaja mayu ai ramma ni matu Scholarship ni lu jaw wa hkra Japan ni hte bawng ban let ta tut galaw sa wa lu na matu mung myit mada akyu hpyi let, dang di ai daram lam tam sa wa na matu yaw da ai lam, Htawshe Hawng Hkawng tsun wa ai.

KCF Nawku Hpung hpe 1992 ning July 14 ya hta ya America kaw nga ai Rev. Maran Yaw hte Myen mung May Myo mare na Lisu Chyum Jawng Up Rev. Dr. La Wu ni woi awn gaw de hpang wa ai rai nga ai. N’dai Nawku Hpung gaw Japan Baptist Union na Tokyo Peace Church n-pu na Hpung langai rai nga ai. KCF Hpung gaw tinang Jinghpaw ga hte Japan mung hta shawng ningnan nawku ai Hpung langai rai nga ai.

Japan mung hta Jinghpaw Wunpawng myusha marai 350 jan nga ai hta law malawng gaw bungli sa galaw ai ni rai nga ai.