Chiang Mai Wunpawng Hkristan Nawku Htingnu Dingshawn Shang na

Naw Awng/ Chiang Mai

December 28, 2004 — Chiang Mai Wunpawng Hkristan Nawku Htingnu hpe du wa na December 31 ya shani hta dingshawn shang poi galaw na lam chye lu ai. Dai poi a matu ya yang Nawku hpung masha ni yawng grai shakut shaja nga ma ai.

Thai mung nga Jinghpaw Wupawng ramma ni gaw Nawku Htingnu dingshawn shang masat hku n’na, “Shi A Htingnu” ngu ai ramma yu ngwi n’sen album No 1 hpe hkawn shapraw da ai nga ma ai. Dai mahkawn album hta Nawku Jawng chyeju shakawn mahkawn, Karai mahkawn hte Thai mung na Jinghpaw ni a lam, AIDS a lam, Buga marit mahkawn hte ni hkawn bang da ai lam ramma amu hku n’na chye lu ai.

Chiang Mai Wunpawng Hkristan Htingnu gaw 1988 ning hta Chaing Mai mare ka-ang hte deng 7 daram tsan ai shara hta n’ta kasha langai gap let Nawku hpang wa ai rai nga ai. 2001 ning kawn dai ni du hkra Nawku Hpung hpe Chiang Mai de du wa ai Rev Dr. Gam Seng hte Ma Ma Alice yan hpung woi wa sai re.

Ya ten hta Hpung masha jahpan bang da ai gaw marai 170 jan rai n’na, yawng marai 200 jan nga ai lam Hpung Tau Jawa Zau tsun wa ai.

Chiang Mai ginwang hta Jinghpaw Wunpawng amyu sha ni gaw Wunpawng Hkristan Nawku Jawng sha n ga, Ban Mai Nawku Jawng (Jinghpaw Kahtawng), Lisu Church, Rawang Christian Church hte Myen hku Nawku ai Grace Church hkan anhte amyu sha ni Karai Kasang hpe Nawku daw jau ma ai rai nga ai.

Thai mung hta anhte amyu sha ni gaw, Wunpawng Mungdan Shanglawt Hpung, KIO, a dat kasa ni 1964 ning kawn sa du ai hpang kawn du shang shanu wa ai rai nga ai. Grau n’na, 1988 ning Myen mung hta democracy kasu kabrawng lam byin wa ai hpang Jinghpaw Wunpawng amyu sha ni lani hte lani grau du sa wa ma ai.