Myen Hpyen Atsuya hpe Madi Shadaw Lam Mahtu Naw Tsun

The Kachin Post

December 07, 2004 — Kachin Defense Army, KDA, ningbaw Du Kaba Mahtu Naw gaw Myen hpyen atsuya woi galaw nga ai mung masa lam yan hpe myit hpawn galaw sa na matu ga sadi jaw ai hpe, The New Light of Myanmar shi laika hku chye lu ai.

Myen hpyen du ni hpe madi shadaw ai lam ga sadi hpe Du Kaba Mahtu Naw gaw lai wa sai Laban shani December 5 ya hta Myen hpyen atsuya amu madu I Lt-Gen Thein Sein hte Sam mung Lashio mare kaw hkrum ai shaloi tsun wa ai rai nga ai. KDA ningtau tingnyang up Du Kaba Zau Yaw hte amu madu Du Kaba Zau Seng ni mung dai hkrum shaga ai lamang hta lawm ai rai nga ai.

KDA hte Myen hpyen du Thein Sein hkrum shaga ai lamang gaw Thein Sein hte Sam mung nga gap hkat jahkring lam la da ai myusha rawt malan hpung 7 hte hkrum shaga ai lam a lamang langai rai nga ai.

Mahtu Naw woi awn ai KDA gaw 1990 ning hta Wunpawng Mungdan Shanlawt Hpung kaw na garan pru mat n’na Myen hpyen atsuya hte gap hkat jahkring lam la da ai uhpung langai rai nga ai. KDA gaw Myen hypen du ni woi galaw ai National Convention, NC, hpe 1993 ning kawn shang lawm wa ai rai n’na 2004 May shata hta bai hpang ai NC hta mung shang lawm ai rai nga ai.