KIO Manghkang hpe Maija Yang kaw Bawngban na Hkyen

The Kachin Post

August 30, 2004 — Wunpawng Mungdan Shanglawt Hpung, KIO, hta byin nga ai manghkang ni hpe madung dat n’na bawngban jahkrup na zuphpawng hpe n’dai bat laman hta Maija Yang mare kaw galaw na lam chye lu ai.

N’dai zuphpawng hta KIO, New Democratic Army-Kachin, NDA-K, Wunpawng Mungbawng Rapdaw, WMR, hte Du Kaba Lasang Awng Wa a KIO hpung na ningbaw ni shanglawm na re lam, KIO Ningtau Ninggawn Amu Madu Du Kaba Sumlut Gun Maw tsun wa ai.

KIO a Je Bat Hpyen Kaba No. 1 ngu masta hkrum ai Kachin National Organization a ningbaw Sut Du Bawmwang La Raw mung shanglawn na lam, Du Kaba Gun Maw tsun wa ai.

2004 ning January shata praw hta KIO Ginjaw hpe zing la na matut maw mawn ai lam byin mat wa ai hpang Du Kaba Lasang Awng Wa hte shi a hpyen ma ni gaw Miwa Gumsan mung de koi yen mat n’na ya ten hta NDA-K Ginjaw Pang Wa mare hta shamu shamawt nga ai rai nga ai.

N’dai zawn re ai KIO kata hta ga garan wa ai lam ni hpe hpran lu na matu WMR na salang ni hku n’na jahkrup nga ai hte maren NDA-K hpung hku na mung KIO Ginjaw de dat kasa 2 lang dat n’na jahkrup ya sai rai nga ai.