Music Seminar Myitkyina kaw Galaw

Malihkrang Uma/ Myitkyina

August 25, 2004 — Myitkyina Ginwang Jinghpaw Wunpawng Hkalup Hpung Ginjaw, KBC, a Hkristan Hpaji Dap kawn woi awn ai yungwi ningbaw ningla ni a sharin bawngban hpawng (Music Seminar) hpe laiwa sai August 16-20 ya lapran kaw galaw laiwa sai rai nga ai.

N’dai sharin hpawng hpe Shatapru Nawku jawng wang kaw galaw ai rai n’na, ramma marai 23 du lung ai rai nga ai. Dai ning na Music Seminar hta Music Sharin ladat ni, music woiawn ladat ni, music sharin hkrang ni, music madang garan ai lam, music madang shatsaw lu na lam ni hte music camp ni a matu aten ladaw ni ka lajang ai lam ni hpe bawngban la lu sai rai nga ai.

Myitkyina ginwang KBC Amu Madu Rev. Hkalam Sam Sun tsun ai gaw, Karai Kasang hpe nawku dawjau ai lam hta mahkawn shakawn ai lam gaw madung rai nga ai majaw Music committee hpe mung ginwang madang sub-committee langai byin lu hkra matut shakut sa wa na lam chye lu ai. Ya ten gaw music committee hpe Hkristan Hpaji Dap a n-pu kaw tawn let bungli galaw nga ai rai nga ai.

Dai ning na music seminar gaw Myitkyina ginwang na Nawku Hpung shagu hkan na music kung-kyang sai ni a matu laksan bawngban hpawng hpe shabyin shatai ya ai lachyum rai nga ai.

Laiwa sai shaning na Music Seminar hpe gaw Rata Kawng na Ginwang Hkristan Ginra kaw galaw ai rai n’na, ningpawt ninghpang music hpaji ni hpe sharin ya wa sai rai nga ai.