Myitkyina Ginwang Lanam Gawdin Ninggang hpe Geis Dang Lu
Malihkrang Uma/ Myitkyina
August 23, 2004 — Myitkyina Mare Hpung Geis gaw July 15 ya kawn ginsup hpang ai Myitkyina ginwang ramma lanam gawdin poi a ninggang hpe Manhkring buga hpung hpe dang n’na madu lu sai rai nga ai.
Ninggang kashun poi final hpe Geis buga hpung hte Manhkring buga hpung ni shingjawng ai rai n’na, Geis gaw Manhkring hpe 7-1 hte dang ai rai nga ai. N’dai gawdin poi hpe July shata htum maga de Myitkyina kaw Hka kaba wa ai ten hta ginsup poi lamang ni hpe jahkring da ai n’na, August 2 kawn bai hpang lu ai rai nga ai.
Gawdin poi hta shang lawm ai ginsup hpung yawng rai yang 12 rai n’na, uhpung 4 garan let shingjawng laiwa sai rai nga ai. Gawdin hpung 12 kaw na quarter-final madang de du wa ai ni hpung ni gaw Maisak Wang, Du Kahtawng, Zi-un, Geis, Manhkring, Emanuela, Behtela hte Shatapru ni rai nga ai.
Dai kaw na semi-final madang de du wa ai hpung ni rai nga ai Shatapru, Manhkring, Geis hte Emanuela rai n’na, ninggang kashun poi final kaw gaw Geis hte Manhkring Buga hpung ni shingjawng ma ai rai nga ai. Semi-final poi hta Manhkring gaw Shatapru hpe dang let, Geis gaw Emanuela hpe dang n’na final poi de du wa ai rai nga ai.
Semi-final poi hte Ninggang kashun ai poi hpe gaw Myitkyina mare ginsup pa kaba kaw galaw ai rai nga ai.
Geis hte Manhkring ni ginsup ai final poi hta Manhkring maga na marai langai yellow card lahkawng lang hte shapru kau katut n’na, jahtum daw hta marai 10 hte sha ginsup mat ai majaw Geis buga hpung gaw Manhkring hpe 7-1 dang mat ai.
Dai ning na lanam ginsup poi hta ningtawn dik gawdin ninghkring ni hpe shagrau ai lam hta, Shawng lam ginsup ninghkring hpe Shatapru na Karing Ja Naw, Lapran lam ginsup ninghkrin hpe Shatapru na Htingnan Zau Naw, Hpang lam ginsup ninghkring hpe Manhkring na marai langai, Goal law dik htawng bang ai ninghkring hpe Geis na No.17 hte uhpung nawng san seng ai lam shagrau kumhpa hpe gaw Emanuela ni lu la masai rai nga ai.
Maning na ninggang hpe gaw Shatapru buga hpung madu lu wa sai rai nga ai.
