KIO Manghkang hpe Ganing N chye Di sai Lam NDA-K Tsun

The Kachin Post

August 15, 2004 — New Democratic Army-Kachin, NDA-K, gaw Wunpawng Mungdan Shanglawt Hpung, KIO, kata kaw byin nga ai manghkang hpe lapran na jahkrup ya nga ai raitim, KIO ningbaw ni hku na n hkap la ai majaw ganing n chye di sai lam, NDA-K ningbaw tsun wa ai.

“Anhte gaw gara hku chye daw dan na law, myit hkrum lam hpe lu la hkra galaw na matu shadut na lam sha nga ai gaw,” ngu NDA-K ningbaw Du Kaba Zahkung Ting Ying The Kachin Post de Telephone hte tsun dan wa ai. “Anhte Wunpawng sha ni a amu magam gaw Wunpawng sha ni nan lu hpran la yang grau kaja ai.”

NDA-K gaw Du Kaba Lasang Awng Wa hte KIO kata hta byin nga ai manghkang hpe shangut kau lu na matu 2 lang dat kasa ni hpe dat let KIO ningbaw ni hte jahkrup wa sai rai nga ai. Raitim, KIO ningbaw ni hku na gaw Lasang Awng Wa hpe magam gun shara kaw na jahkrat kau sai sha n ga, hpyen ngu na masat kau sai re majaw jahkrup bawng ban na matu n mai byin sai lam tsun wa ma ai.

August 7 ya hta NDA-K dat kasa Layawk Ze Lum hte Labuk Hawng Hkawng ni gaw KIO ningbaw ni hte Pajau kaw hkrum bawng ban ai shaloi, Lasang Awng Wa hte seng n’an Wunpanwg Mungbawng Rapdaw de ap sai raitim, KIO ningbaw ni gaw Lasang Awng Wa hte hkrum bawng ban na lam hpe ningdang ai lam chye lu ai.

De hpang August 11 ya hta, NDA-K ningbaw ni hte Lasang Awng Wa a hpung ni gaw Pang Wa mare kaw KIO manghkang hte seng n’na zuphpawng galaw ai rai nga ai.

Dai zuphpawng kaw shang lawm wa ai Sara Doi La tsun ai hku rai yang, zuphpawng ngut ai hpang n’dau laika langai shapraw ai lam chye lu ai. Dai laika hta, NDA-K hpe gasat na matu matsun hkrum ai shanglawt hpyen la ni yawng NDA-K de wa marit, hte Lasang Awng Wa hpe gasat na matu matsun hkrum ai shanglawt hpyen la ni yawng Lasang Awng Wa woi awn ai KIO/ KIA hpang de lawan kahkin wa marit ngu ka da ai lam, Sara Doi La tsun wa ai.

Lama wa KIO hku na hpyen n’gun hte gasat wa ai lam ni nga wa yang mung, tinang hkum tinang makawp maga na lam sha nga ai ngu, Zahkung Ting Ying tsun wa ai. “Mung masha ni hpe anhte hku n’na gap hkat shangun ai bungli gaw hkrak anhte n galaw na re.”