NLD Campaign Pat Shingdang Hkrum

Hkawn Nu

August 12, 2004 — Myen hpyen atsuya gaw Democracy ningbaw Aung San Suu Kyi hpe dat ya na matu National League for Democracy, NLD, kawn woi galaw ai campaign hpe pat shadang ninghkap nga ai lam, AFP shiga hku chye lu ai.

Myen hpyen atsuya gaw n’dai campaign woi galaw ai ni hpe “shawa simsa lam hpe jahten ai ni” ngu da nga ai. N’dai campaign hpe woi awn ningbaw ai Myen mung shara shagun de na NLD salang ni hpe mung n’gun gamyet (pressure) jaw nga ai lam chye lu ai. Aung San Suu Kyi gaw laning mi jan Yangon na shi a n’ta hta sharen da hkrum ai rai nga ai.

N’dai campaign galaw ai a yaw shada lam ni gaw Aung San Suu Kyi hte NLD ningtau ningbaw Tin Oo hpe sharen da ai kaw na dat ya na matu hte mungdan ting na NLD rung ni hpe bai hpaw lu na matu hpyi shawn ai lam ni rai nga ai. N’dai campaign hpe July 19 ya kawn galaw hpang ai rai nga ai.

“Myen hpyen atsuya hku n’na mungmasha ni a shanglawm ai lam ni hpe pat shingdang ninghkap ya ai hpe ginwang daw reports ni hku chye lu ai, kadai hpe mung lata masat ka ya na matu n shadut ai, kadai mung tinang myit sharawng ai hku galaw na ahkang nga gying ai,” ngu NLD tsun shaga ahkang lu ai wa U Lwin tsun wa ai.

Yangon mare nga mung masa la usa ni hte kaga Myen mung shanglawt rawtmalan hta shang lawm wa ai ni gaw hpyishawn laika hta lata masat ka ai lam hpe n’dai bat 1 ya hta galaw ma ai.

NLD gaw lai wa sai 1990 ning hta galaw ai ralata poi hta dang da ai mungmasa pati raitim, mungdan uphkang lu na daru magam hpe ap ya na matu Myen hpyen astuya gaw nyet da ai rai nga ai. Myen hpyen atsuya gaw 1962 ning kaw na hpyen gumshem ladat hte uphkang hpang wa sai gaw dai ni du hkra rai nga ai.