KIO Manghkang hpe WMR Lata de Ap

The Kachin Post

August 11, 2004 — Wunpawng Mungdan Shanglawt Hpung, KIO, kata hta January shata kaw byin lai wa sai manghkang a majaw Du Kaba Lasang Awng Wa koi yen mat n’na shi a uhpung langai hku lak san shamu shamawt wa ai lam hpe hpran na matu Wunpawng Mungbawng Rapdaw, WMR, a lit rai sai lam, KIO ningbaw langai tsun wa ai.

WMR hpe lit ap ya ai lam gaw August 7 ya hta KIO Ginjaw Pajau kaw KIO hte New Democratic Army-Kachin, NDA-K, na ningbaw ni hkrum bawng ban ngut ai hpang byin pru wa ai rai nga ai. Dai zuphpawng hta KIO Ninggawn Amu Madu Du Kaba Gunhtang Gam Shawng hte NDA-K na Du Kaba Layawk Ze Lum ni hkrum shaga ma ai rai nga ai.

“WMR kaw na lit la taw nga sai re majaw gaw WMR kaw na daw dan ya ai hku sha rai na re,” ngu Du Kaba Gam Shawng The Kachin Post de tsun wa ai. “WMR kaw na daw dan ai lam pru wa na re.”

August 3 ya hta, KIO kata kaw byin nga ai lam ni hte seng n’na WMR dat kasa marai 3 gaw Pang Wa mare hta Du Kaba Lasang Awng Wa hte shi a malawm ni hpe san sagawn sai rai nga ai. De hpang, WMR dat kasa ni gaw KIO Ginjaw Salang ni hte bai hkrum shaga ma ai rai nga ai.

Du Kaba Gam Shawng tsun ai hta, shawng de gaw Du Kaba Lasang Awng Wa hte seng n’na KIO hte NDA-K shada jahkrup hkat na hku raitim, NDA-K ningbaw Du Kaba Zahkung Ting Ying hku n’na WMR hku lit la bawng ban na hpe ra sharawng ai majaw KIO hku na myit hkrum ya ai re lam chye lu ai.

KIO gaw WMR dat kasa ni hpe hpe January shata na KIO a daru magam zing la na lam hta shang lawn ai ngu n’na magam gun shara kaw na dawm kau hkrum ai Du Kaba Hpauyam Tsam Yan hte hkrum n’na san sagawn na ahkang jaw sai lam chye lu ai. KIO a Je Bat Hpyen Kaba No. 1 ngu masat da hkrum ai Kachin National Organization a ningbaw Bawmwang La Raw hte mung WMR hku n’na Telephone hte hkrum shaga sai rai nga ai.