Lung Seng Tawng Kaba matu Madun Htingnu
Gaw Gap Hpang

The Kachin Post

August 9, 2004 — Phakant Seng Maw na Mungkan hta kaba dik htum ai Lung Seng tawng a matu Madun Htingnu hpe Myen Hpyen Atsuya hku n’na ga kata kaw gaw gap magang wa sai lam, 7 Days News Journal hku chye lu ai.

Galu de meter 21, kaba de meter 4.8, tsaw de meter 10.5 shadawn shadang nga n’na nam nak ton 3,000 nga ai Lung Seng tawng kaba hpe 2000 ning hta Myen Hpyen Atsuya hte simsa lam la da ai Pa-O National Organization, PNO, a Ruby Dragon Jade & Gems Co., Ltd madu ai Lung Seng n’hkrun kaw na mu la ai rai nga ai.

2002 ning May 26 ya hta, PNO ningbaw Aung Hkam Hti hku n’na n’dai Lung Seng tawng hpe Myen Hpyen du Khint Nyunt lata hta manu jahpu n la ai sha ap ya kau sai rai nga ai.

Lung Seng tawng a matu Madun Htingnu hpe ga kata meter 30 sung ai kaw galaw na lam chye lu ai. N’dai Madun Htingnu ngut mat ai rai yang, mungkan hta shawng ningnan na ga kata Madun Htingnu rai wa na nga ai.

Myen mung gaw mung kan hta Lung Seng hte ga kata na manu dan ai n’hprang rai kaja lu ai hta mying gumhkawng ai mungdang langai rai nga ai. 1995 ning kawn Myen Atsuya gaw Ja Lung Seng Upadi ningnan shapraw n’na, Myusha company ni hpe Ja Lung Seng htu shaw, dut sha na matu tara shang ahkang jaw wa sai rai nga ai.