Bangkok kaw Jinghpaw Ramma ni Rim Hkrum

The Kachin Post

August 8, 2004 — Thai mungdan Bangkok mare hta Jinghpaw Wunpawng Ramma marai 3 gaw Myen Hpyen du ni hpe n ra sharawg ai lam ninghkap n’gun madun ai majaw rim katut ai lam, shanhte a manang ni tsun wa ai.

Jaw San Naw, Zau Naw hte Seng Pan ni gaw dai hpawt 10:30 hta kaga Myen mung na ramma 20 jan hte rau Bangkok mare na Myen dat kasa rung (Embassy) shawng kaw rim katut n’na, ya ten hta Immigration Detention Centre kaw du nga sai lam, Bangkok kaw na Lahpai Zau Gun tsun dan wa ai.

Jinghpaw Wunpawng ramma 3 gaw dai ni na 8888 Myen mung democracy rawtmalan a ningpawt ninghpang kasu kabrawng byin wa ai 16 ning hpring masat ninghtoi hta Myen Hpyen Atsuya hpe n ra sharawng ai lam n’gun madun ma ai rai nga ai. Shanhte ni gaw Myen mung democracy ningbaw Aung San Suu Kyi hpe rim da ai kaw na dat ya na matu, Mung shawa ni a lu ging ai ahkaw ahkang ni hpe jaw na matu hte Myen mung hpe Myen Hpyen du ni up hkang nga ai hpe n ra sharawng ai lam ni hpe hpyi jahtau wa ai lam chye lu ai.

Zau Gun tsun ai hku rai yang, ramma marai 3 gaw Bangkok na UN High Commissioner for Refugee, UNHCR, kaw tsinyam masha masat ya na matu hpyi shawn da ai ni rai nga ai.

Ramma marai 3 kaw na Jaw San Naw gaw Myen Hpyen Atsuya hpe ninghkap nga ai Wunpawng Jawngma hte Ramma Hpung (All Kachin Students and Youth Union, AKSYU) kaw na Bangkok lit hkam re lam, Chiang Mai mare na AKSYU lit hkam tsun wa ai. AKSYU gaw 1996 ning hta hpaw hpang wa n’na Myen mung hta democracy hte shinggyim ahkaw ahkang lu na matu India, Thailand hte Miwa Gumsan mung hkan shamu shamawt nga ai hpung langai rai nga ai.