Lazing La Htoi hpe Dat na matu Shadut

The Kachin Post

August 6, 2004 — Myitkyina mare Hka lim mabyin masa hpe sumla gayet n’na video compact disc, VCD, galaw shabra ai majaw Myen hpyen du ni a rim la hkrum ai Lazing La Htoi hpe kalang ta dat ya na matu Shi Laika sara ni hpe makawp maga ai hpung ni hku n’na shadut dat ai lam chye lu ai.

France mungdan Paris mare hta rung jung ai Reporters Sans Frontieres, RSF, hte Burma Media Association, BMA, ni gaw Lazing La Htoi hpe rim jep nga ai kaw na kalang ta dat ya na matu Hpyen Atsuya ningbaw Than Shwe hpe August 4 ya hta shadut da nga ai. Dai hte maren Myen Hpyen du ni n’dai zawn galaw ai lam gaw wanglu wanglang shiga lu la lam hpe ladat ningnan hku pat shingdang shamyit ai re ngu tsun da nga ai.

Myitkyina mare na Htoi San Htangdip jak madu Lazing La Htoi gaw July 27 ya hta Hka lim masat masa sumla VCD 300 hpe ahkang n lu ai sha shabra ai ngu n’na rim shaga la let shi shabra da ai VCD ni hpe bai zing kahkin la na matu matsun da ai rai nga ai. Dai VCD galaw shapraw ai Cyber Computer Centre hpe mung pat kau ya ai rai nga ai.

July shata hta Myitkyina mare hta Hka kaba wa ai majaw masha 50 daram si mat n’na Myitkyina hte makau grupyin na n’ta n law htum 5,000 daram hten run mat n’na mung shawa law law jam jau hkrum mat tim, Myen Hpyen Atsuya shi laika hta gaw masha si ai hte arung arai sum mat ai lam n nga ai ngu n’na shiga hta ka da nga ai.