WMR Dat Kasa Lasang Awng Wa hte Hkrum

The Kachin Post

August 5, 2004 — Wunpawng Mungbawng Rapdaw, WMR, (Kachin Consultative Assembly) na dat kasa ni gaw Jinghpaw mung Pang Wa mare kaw shingbyi nga ai Du Kaba Lasang Awng Wa hte malawm ni hpe hkrum shaga ma ai lam chye lu ai.

WMR dat kasa Hkawng Je, Dingyau Zau Ing hte N’hkum Tang ni gaw August 3 ya hta Du Kaba Lasang Awng Wa hte hkrum n’na Wunpawng Mungdan Shanglawt Hpung, KIO, kata kaw byin nga ai lam ni hte seng n’na san sagawn ma ai lam, Lasang Awng Wa tusn wa ai.

“Kaga mi wa bawng ban ai n re, n’dai anhte a mabyin ningpawt kaw n’na wa san la ai sha re,” ngu Lasang Awng Wa tsun wa ai.

Du Kaba Lasang Awng Wa gaw WMR dat kasa ni hpe Januray shata na manghkang sha n ga, lai wa sai 2001 ning Februay shata hta Du Kaba Malizup Zau Mai hpe shara kaw na hpa majaw shapraw kau ai lam ni hte seng n’na mung hkum hkum tsup tsup sang lang dan sai lam chye lu ai.

Sara Doi La, Du Padip Gam Awng hte Pang Wa kaw du nga ai Lasang Awng Wa a malawm n’kau mi mung shanhte a mahkrum madup ni hpe WMR dat kasa ni hpe tsun dan ai lam chye lu ai.

“Sara Doi La tsun ai sha hkum kam mu, Du Kaba Padip tsun ai mung hkum kam mu, dai hte maren Lamung Tu Jai tsun ai hpe mung hkum kam mu, N’ban La tsun ai hpe mung hkum kam mu, Gauri wa tsun ai, Gam Shawng tsun ai mung hkum kam, kadai mung kadai maga gang na sha re,” ngu Lasang Awng Wa WMR dat kasa ni hpe tsun wa ai lam hpe The Kachin Post de tsun dan wa ai.

WMR hku n’na, mung shawa dap shawa ni a lapran hta a’katsi sha shang let mu mada ai lam ni hpe hta la yang kaja na lam, Lasang Awng Wa matsun wa ai. Shi matut tun ai hta, ya byin nga ai manghkang ni gaw WMR kaw na daw dan lu na n re ai hte, mung shawa ni yawng myit hkrum daw dan yang she mai byi ai lam tsun wa ai.

WMR dat kasa ni gaw July 4 ya hta Pang Wa kaw na bai n’htang mat sai lam chye lu ai.