Myitkyina Ramma ni Mungkan Ga N’htoi hta Hpun Hkai

The Kachin Post

April 25, 2004 — Myitkyina Dakkasu na Hkristan ramma ni gaw April shata 23 ya hta Hpun hkai let Mungkan Ga n’htoi (Earth Day) hpe masat dingsat galaw ai lam ramma ningbaw langai tsun wa ai.

N’dai masat dingsat galaw ai hpe Myitkyina mare na Student Christian Movement SCM hpung kawn woi awn galaw ai rai n’na Karai Kasang hpan da ai Mungkan ga hpe tsawra ai masat masa hku galaw ai lam chye lu ai. Hpun hkai ai lam hpe Myitkyina Dakkasu makau na Shatapru, Gindai lawk kaw galaw ai rai nga ai.

“Daini Mungkan hpe tsawra ai lam n nga ai sha, tinang hkum hpe Mungkan ga hte n seng ai zawn shadu nga ai shinggyim masha ni a majaw, Mungkan n’tsa hta tsit tsawm ai shingra maka ni mat mat ai law law rai sai,” ngu Shatapru Buga Hkalup Hpung a Youth Director Hkalen Tu Hkawng tusn wa ai.

Ya ten hta anhte a buga Jinghpaw mung hta tinang a akyu amyat sha yu ai hpaga la ni hte mungmasa uhpung uhpawng n’kau mi a majaw Karai Kasang hpan da ya ai tsit lali ai nam maling ni krin mat n’na shingra maka ni aging agang hten za mat sai rai nga ai.

Mungkan Ga n’htoi Hpun hkai ai poi hta, SCM lithkam Rev. Kareng Brang Awng woi awn galaw ai rai n’na, SCM Ninghpum salang Hpaji Du Usa Kareng Naw Tawng hte Sara kaba Sumlut Naw jan Sarama kaba Ja Bawk hte SCM ramma ni shanglawm ai rai nga ai.

Myitkyina SCM hpe gaw Myitkyina Ginwang Hkalup Hpung ginjaw kawn lit la ninghpum tai ya let shamu shamawt nga ai rai nga ai. SCM a ginjaw madung gaw Myanmar SCM ngu ai rai n’na, Myanmar Council of Churches MCC a department langai rai nga ai.

Mungkan Ga n’htoi (Earth Day) hpe April 22 ya hta Mungkan ting a masat dingsat n’htoi langai hku galaw ai rai nga ai.