Ningbaw Tai Mayu ai Majaw Mungmasa Galaw ai N re Lam Bawmwang La Raw Tsun
The Kachin Post
April 18, 2004 — London mare kaw nga ai Sut Du Bawmwang La Raw gaw Jinghpaw Wunpawng myusha ni a ningbaw tai mayu ai majaw mungmasa galaw ai n re lam tsun wa ai. N’dai hku tsun ai lam hpe April 15, 2004 n’htoi hte Wunpawng Mungdan Shanglawt Hpung KIO ningbaw ni hpe shagun ai laika hta ka da nga ai.
“Ningbaw shara masem n’na amyusha lam tsap ai ngu ai gaw, gaya hpa re,” ngu Bawmwang La Raw tsun ai. “Anhte[KIO] ningbaw ni hpe kam n’na n byin n mai amyu hte mungdan lam hta shakut lawm ai lam sha rai n’ngai.” Bawmwang La Raw gaw Pan Kachin a ningbaw langai rai n’na Kachin National Organzation KNO hpung hpe woi hpaw hpang wa ai wa rai nga ai.
Shi hpe January shata KIO Ginjaw hta byin ai manghkang hte seng n’na KIO a daru ahkang aya hpe gare la na matu shakut shaja ai lam hta ningbaw langai hku na shang lawm ai wa ngu masat let ya ten du hkra mara dat ai lam n nga shi ai rai nga ai.
Ginjaw manghkang ngut ai hpang KIA Chief of Staff Du Kaba N’ban La tsun ai hta KNO hku n’na n’dai masing hpe galaw hpang wa ai re lam hte dai masing gaw KIO hpung hpe KNO ngu mying galai kau n’na KNO a masha ni shara la uphkang sa wa na re.
Raitim Bawmwang La Raw gaw “KIO hpe KNO shatai na nga ai mung n jaw ai,” ngu tsun wa ai. Dai sha n ga KIO ningbaw ni hku na shi hpe amyu myu nga jahpoi ai lam ni hte seng n’na mung myit machyi na zawn re ai lam tsun ai.
“Maigan kaw ja hpaga lam yak n’na, mungdan kata kaw ja hpaga lam lu shalau na matu galaw nga ai ngu tsun ai mung n teng ai,” ngu Bawmwang La Raw tsun wa ai. “Mungdan kata na Hpun maw, Ja maw ni hta mung kachyi mi mung shanglawm shalau ai lam n nga ai.”
Shi a myusha lamyan hta shakut shaja ai lam hta, moi 1972 ning shia a asak 16 ning shaloi Wunpawng Mungdan shanglawt Hpyen Dap KIA hta magam gun wa sai hte hpang de mung KIO/ KIA n gun ja wa na matu Ja Gumhpraw ni hpe garum wa sai lam tsun da nga ai.
Bawmwang La Raw tsun ai hku rai yang KIO/ KIA hpe US $ 2.2 million jan hte Hong Kong $ 10 million hpe garum jaw sai lam chye lu ai.
KIO hte seng n’na Bawmwang La Raw tsun da ai hta KIO gaw mung shawa a Hpung rai ra ai hte gawng malai tai la let lam shagu hta ningshawng tai ya ra ai. “KIO hpyen dap mung Mungshawa a hpyen dap rai ra ai,” ngu shi tsun da nga ai.
