NLD Ginjaw Rung Bai Hpaw

The Kachin Post

April 17, 2004 — Yangon mare na National League for Democracy NLD pati Ginjaw rung hpe dai hpawt manap jau jau hta bai hpaw na matu Myen Hpyen Atsuya ni ahkang jaw sai lam hpe AP shiga dap hku chye lu ai. Raitim Myen mung ting na NLD rung ni hpe gaw naw pat da ai rai nga ai.

“Rung bai hpaw ai gaw kaja ai lam re. Ya anhte hkrum zup na shara lu sai,” ngu NLD Ginjaw salang langai rai nga ai Nyut Wei AP shiga dap de tsun wa ai. “Htawng rawng nga ai Mungmasa la ni hpe dat ya ai zawn re ai kaja lam ni byin wa na hpe anhte myit mada nga ai.”

NLD Ginjaw rung hte mung dan ting na NLD rung ni hpe maning May shata 31 ya hta pat kau ya ai rai nga ai. De shawang shani rai nga ai May shata 30 ya hta Mongywa ginwang Depayin mare hta Hpyen Atsuya maga lawm ai masha ni gaw NLD malawm ni hpe aging agang adup abyen n’na, dai ni du hkra NLD malawm law law hpe rim da ai rai nga ai. Dai shani na mang hkang hta NLD malawm n law htum marai 4 si n’na, 100 daram hkala hkrum ai rai nga ai.

Lai wa sai bat 2 ya shani, April 13, hta NLD Ginjaw Salang lahkawng rai nga ai Tingnyang Up Aung Shwe hte Amu Madu U Lwin ni n’ta kaw rim rawng da ai kawn bai lawt wa sai raitim Ninggawn Amu Madu Aung San Suu Kyi hte Ningtau Tingnyang Up Tin Oo hpe gaw n dat ya shi ai rai nga ai.

N’dai zawn NLD Ginjaw rung bai hpaw ya ai lam gaw Myen Hpyen Atsuya a National Convention a matu hkyen lajang nga ai lam ni raitim Aung San Suu Kyi hpe galoi dat ya na ngu ai gaw gadai mung n lu tsun shi ai rai nga ai.

NLD salang ni gaw Aung San Suu Kyi hpe May 17 hta galaw hpang wa na National Convention n du shi ai laman hta dat ya re ngu shadu nga ma ai.