Sara Doi La hpe N Jeyang Shi

The Kachin Post

April 15, 2004 — Laiza mare na Hkalup Hpung Up Sara Doi La hpe January shata na Wunpang Mungdan Shanglawt Hpung KIO Ginjaw hta byin ai manghkang hte matut manoi nga ai ngu n’na ya ten du hkra rim rawng da tim Karai magam gun langai re majaw jep dawdan ai lam n mai galaw shi ai lam, KIO Du Kaba langai tsun wa ai.

KIO hku n’na Sara Doi La hpe Ginjaw mang hkang hta ahkyak ai shara hta shanglawn ai masha ngu ai hku shadu ai majaw January 15 ya hta Ginjaw de shaga la n’na rim da ai rai nga ai. Sara Doi La gaw Laiza maren na Nawng E Hku Buga Hpung a Hpung Up langai rai nga ai.

“Hpung Up ni gaw Karai hte matut n’na aya jaw da ai re majaw, anhte[KIO] gaw Hpung Up ni hpe jeyang na gaw n mai byin na re, dai majaw la taw nga ai re,” ngu KIO Ninggawn Amu Madu Du Kaba Gunhtang Gam Shawng tsun wa ai. “Raitim anhte majoi hkrup mara n rai ga ai,” ngu matut tsun wa ai.

Sara Doi La a manghkang hte seng n’na gaw shi a Nawng E Hku buga hpung masha ni hku n’na shi hpe n ra sharawng sai majaw Hpung Up aya kawn raw kau ya na matu Sama Ginwawng Buga Hpung de tang shawn n’na dai kawn tara shang daw dan yang she mai byin ai lam chye lu ai.

Hpung masha ni hkraw n’na Sara Doi La hpe Hpung Up aya jahkrat kau ai hpang she KIO hku n’na tara jeyang mai na re lam Du Kaba Gam Shawng tsun wa ai.

Wunpawng Mungdan Shanlawt Kongsi hku n’na February shata 24 ya hta shapraw ai mara raw dat ai Aming hta Sara Doi La gaw mara dat ai jahpan hta n lawm ai rai nga ai. Raitim shi gaw Karai magam gun langai re majaw shi a mying hpe mara n dat ai jahpan hta mung n ka shalawm da ai lam Du Kaba Gam Shawng matut tsun wa ai.

Ginjaw manghkang hte seng n’na Du Kaba Lasang Awng Wa, Du Kaba Hpauyam Tsam Yan, Du Kaba Padip Gam Awng hte Duwa Bawmwang La Raw ni gaw KIO a mara dat ai jahpan hta n lawm ai ni rai nga ai.