National Convention Ningtsa KIO Policy Galai Shai Lam N nga

The Kachin Post

January 30, 2004— Wunpawng Mungdan Shanglawt Hpung KIO gaw Myen Hpyen Atsuya woi galaw na hkyen nga ai Munghpawm Amyu Sha Mungbawng Zuphpawng Kaba National Convention de sa shang lawm na lam ningtsa galai shai lam n nga ai hte dai lam ni hte seng n’na ra ai lam ni hpe Mung Shawa myitsu ni hte bawngban hkyen lajang dingyang re lam chye lu.

KIO a policy n galai shai ai lam hpe Janury 19 ya kawn 28 ya du hkra hpawng ai Ginjaw Committee Pran Wan Hkumra Zuphpawng a n’dau shabra laika hta ka da nga ai.

KIO gaw National Convention de lung na matu dat kasa marai 5 hpe lata da sai rai n’na Myen Mung Hkringmang Daju Khin Nyunt a ninggam 7 rawng ai Mung masa Lam Matsun hpe mung shawng ningnan madi shadaw ai uhpung langai rai nga ai.

National Convention de shang lawm na matu hkyen lajang nga ai KIO a policy hpe n ra sharawng ai ngu kam la mai ai KIO Ginjaw Salang n’kau mi hte maigan nga uhpung langai hku na January shata praw hta KIO a policy hpe galai shai kau lu na matu shakut shaja ai lam byin pru wa ai majaw KIO Ginjaw hta manghkang pru wa sai rai nga ai.

“Ginjaw Salang 2 grup yin a chyinglau ai hpe madat shut, kam shut n’na tinang KIO a jasat jasa policy hpe galai kashai kau mayu ai majaw byin pru wa ai lam re,” ngu Ginjaw n’dau shabra laika hta ka da nga ai.

Raitim, dai mang hkang hpe KIO Ginjaw Salang ni hku na lawan ladan hparan kau lu sai majaw ya ten mi na masa de bai du sai rai nga ai.