Lasang Aung Wa hpe Yen Shangun ai N re Lam Dr Tu Ja Tsun
The Kachin Post
January 15, 2003— Wunpawng Mungdan Shanglawt Hpung KIO Ginjaw hta laiwa sai bat laman byin wa ai manghkang hta Du Kaba Lasang Aung Wa gaw shi hte shi yen mat ai re lam Ginjaw Salang langai tsun wa ai.
KIO Ninggawn Amu Madu Du Kaba Dr Tu Ja gaw Du Kaba Lasang Aung Wa hpe Ginjaw Liaison Bum kaw na yen shangun ai n re ai lam hte shi a myit lu ai hku yen mat ai she re lam hpe The Kachin Post de tsun dan wa ai. “Lasang Aung Wa hte Bawmwang La Raw hpe ngai yen shangun ai n re,” ngu Dr Tu Ja tsun wa ai.
Ya ten hta dai mang hkang hte seng n’na KIO jep sagawn Commission langai hpaw let sawk sagawn hparan nga ai lam hte dai Commission hpe Dr Tu Ja hte Du Kaba Gauri Zau Seng ni woi awn lit la nga ai lam chye lu ai. Ginjaw Committee hku na n’dai mang hkang hpe si mani ai ladat hku hparan sa wa nga ai lam mung chye lu ai.
“Ya ten hta gaw kaba ai manghkang hpe kaji hkra, kaji ai manghkang hpe shamat kau lu hkra dai hku galaw ga ngu na jum tek wa ai ten re,” ngu Dr. Tu Ja tsun wa ai.
Ngut n’na KIO Chief of Staff Du Kaba N’ban La Miwa Gumsan mung hta tsi rung rawng nga ai ten hta shi hpe shiga shadam jaw ai mung shi n re ai lam Dr. Tu Ja tsun dan wa ai.
Du Kaba N’ban La tsun ai hku rai yang shi tsi rung rawng nga ai ten hta Ginjaw hpe zingla kau sai lam Du Kaba Lasang Aung Wa ni hku na shiga shana dat ai ngu tsun wa ai. “Ginjaw Committee bai galai sai, N’ban Wa ni Lazing Wa ni gaw Hpyen dap n jum sai,” nga n’na Du Kaba Lasang Aung ni n’dau shabra wa ai re lam hpe Du Kaba N’ban La The Kahin Post de tsun dan wa ai.
“Shanhte gaw ngai kan ga sai majw n shamu lu sai ngu hku shanhte sawn ai. Raijang she ngai kan ga hkyen nga kaw na kalang ta bai yu wa n’na, Laiza kaw hpyen hpung hte bai hkrum n’na, n’dai gaw angwi apyaw hparan ga ngu na Gijaw de lung wa ai,” ngu Du Kaba N’ban la tsun wa ai. “Ngai lung wa ai na jang shanhte yawng hprawng mat wa ai.”
Ya ten hta KIO Ningbaw Kaba Malai Du kaba Tsam Myen, Du Kaba Lasang Aung Wa hte shi a masha n’kau mi hpe KIO magam gun shara kaw na jahkring kau sai ngu ai shiga hte seng n’na mung KIO ginjaw hku na tara shang n’dau shabra ai lam n nga shi ai hpe chye lu ai.
