KIO Ginjaw hta Manghkang Byin

The Kachin Post

January 9, 2004 — Wunpawng Mungdan Shanglawt hpung KIO Kaichyan Du Kaba Lasang Aung gaw ya ten hta koi yen taw nga n’na shi a hpyen ma ni mung dumbru dumbra rai nga ai lam KIO shiga lawk hku chye lu ai.

N’dai lam gaw Ginjaw Salang ni hku na Du Kaba Lasang Aung shi a hpyen ma ni hte Ginjaw kaw galaw nga ai Mungshawa ni a n’sen hte seng ai zuphpwng hta n’gun sa madun nga ai hpe ‘Coup’ galaw na shadu ai majaw byin wa ai rai nga ai. Ginjaw salang ni hku n’na Lasang Aung a dap hpe ninghkap na matut Laiza na hpyen dap hpe shaga dat ai shaloi shada da chyi hkat wa na lam byin pru wa ai rai nga ai. Raitim hpa hkala n’ba n byin ai lam ai chye lu ai.

“Du Kaba Lasang Aung gaw jahkring mi gan yen nga ai,” ngu KIO Kaichyan langai tsun wa ai. “Dai gaw shada n chye na hkat wa ai majaw re.”

Du Kaba Lasang Aung gara de yen nga ai lam hpe n chye lu ai rai tim shi a hpyen ma ni hpe gaw Ginjaw hpyen dap ni hku na hkan tam mahkawng nga ma ai. Ngut na n’dai bat laman Ginjaw hta galaw nga ai Mungshawa ni a n’sen hte seng ai zuphpawng hta sa du lung ai Salang ni hte Ramma ni mung dai hpawt yawng yu wa sai lam chye lu ai.

“Dai hpawt gaw hpyen la ni hpe rim ai kun hpa kun gaw n chye ai, Myusha Shimlam ni hpe gaw hkan mahkawng taw nga ma ai,” nga n’na Laiza mare na salang langai tsun wa ai. “Mahkawng ai rai kun rim na hku rai kun n chye shi nga le,” ngu matut tsun wa ai.

Du Kaba Lasang Aung gaw Myusha Shimlam National Security Council hpe woi awn shamu shamawt nga ai rai n’na shi n’pu hta Kaichyan hpyen ma 200 jan hte shamu shamawt nga ai rai nga ai.

Ginjaw na zuphpawng de sa du lung ai Sut Du Bawmwang La Raw mung Miwa mung de yen ra mat ai lam chye lu ai.