Myusha Yawng a Gam Maka hpe KIO Hkrai N mai Daw Dan; Mungshawa ni Tsun

The Kachin Post

January 9, 2004 — Jinghpaw Wunpawng myusha yawng a gam maka hpe Wunpawng Mungdan Shanglawt Hpung KIO hkrai sha n mai daw dan sai lam hpe Mungchying sha ni shadut dat ai lam chye lu ai.

Dai shadut dat ai lam hpe lai wa sai December shata 28 ya n’htoi hte n’dau shabra ai ‘Mungshawa ni a N’sen’ hta ka da nga ai. Mungshawa ni a n’sen hpe Nawku Hpung kanu kawa ni, Buga Ramma Ningbaw ni , Dakkasu Jawngma ni, Chyum Dakkasu Jawngma, Sara ni, Mungshawa Ningbaw Ningla ni yawng myit hkrum ta masat mahkret na n’dau shabra dat ai rai nga ai.

N’dai laika hpe KIO ginjaw committee de hkringdat matsun let kashagun dat ai rai n’na, kanan ni hpe mung Makam Masham hpung ni yawng, Dakkasu Jinghpaw Laili Laika Hpung ni yawng, Chyum Dakkasu hte Hkawlik ni yawng hte seng ang ai uhpung uhpawng ni yawng hpang de shabra dat sai rai nga ai.

Mungshawa ni a n’sen gaw 2004 ning kaw n’na “KIO Ginjaw policy hte uphkang hkrang ni galai ging sai,” ngu tsun da nga ai. “KIO Ginjaw salang ni hkrai sha, Amyu hte Mungdan a gam maka hpe n lu hparan sai, n lu woi awn sai” lam hpe mung Mungshawa ni sha n’ga maigan masha ni du hkra dinglun ai lam law law nga wa sai ngu na mung matsun madun da nga ai.

Dai ni du hkra KIO grin nga lu ai lam mung KIO a woi awn ai lam hta policy jaw na, laknak kaja na, woi awn ai wa kaja na n re ai sha Mung Shawa yawng a myu tsaw myit marai san san hte shang lawm n’gun jaw garum ai majaw sha re ai lam dai laika hta tsun da nga ai.

Dai re majaw ya dai ni KIO a ahkyak ai uphkang dap ni hkan Mungshawa ni shanglawm uphkang sa wa ra sai lam hpyi lajin da nga ai. KIO Ningbaw shara ni, Ninggawn Amu Madu shara ni, Maigan Kyithkai hte Sut Masa dap ni hta Mungshawa hte KIO ni gumhpawn n’na Mungdan ngwi pyaw simsa rawt jat galu kaba wa lam lu na matu gaw sharawt ra sai lam tsun da nga ai.

Laiwa sai shaning 40 ning jan rawtmalan prat hta Mungshawa ni gaw “Nau shawng wa a hpang hkan ai zawn” myi di chyip rai KIO ginjaw salang ni a hpang hkan wa sai raitim myusha yawng myitmang yawshada nga ai pandung de n du wa ai majaw n’dai zawn rai galaw ai re lam laika hta tsun da nga ai.

N’dai zawn rai Mungshawa ni a shadut ai lam ni gaw laiwa sai December shata Myen hpyen du ni a Simsa lam dat kasa Saboi Jum a Myen hpyen du Khin Nyut hte jahkrup n’na N’lung N’nan shat sha poi galaw let Myen hpyen du ni a maw lanyet ai lam de myusha yawng gadawng bang na matu woi galaw ai hpang byin pru wa ai rai nga ai.

Ya ten hta KIO a Myen hpyen du ni hkyen lajang nga ai National Convention de lung na lam hte seng n’na mung Mungshawa law malawng gaw madi shadaw ai lam n nga ai rai nga ai. KIO gaw National Convention de lung na matu ga sadi jaw da sai rai n’na dat kasa marai 5 hpe mung lata da sai rai nga ai.