ABSDF Malawm ni hpe Gawt na matu KIO Shadut Hkrum

The Kachin Post

September 26, 2003—Jinghpaw mung daw kaw shanu nga ai Myen Jawngma rawtmalan hpung ABSDF malawm ni hpe yen ya na matu Myen hpyen asuya hku na Wunpawng Mungdan Shanglawt hpung KIO hpe shadut wa ai lam hpe ABSDF hte KIO shiga lawk hku chye lu ai.

N’dai lam the seng n’na Myitkyina kaw rung jung ai Myen kaichyan rung kawn KIO hpang de shadut dat ai rai nga ai. Myen hyen du ni hku na KIO kawn dai ABSDF malawm ni hpe lit la ya ra na lam hte, n lu lit la yang shanhte shang rim na lam tsun jahkrit wa ma ai. Dai lam ni hpe KIO du ni hku na ABSDF jawngma ni hpe bai tsun dan ai lam ABSDF Du Jum La Seng tsun ai.

“Anhte gaw, mung masha hku nga nga saga ai, mung masa mung n galaw ga ai, raitim hpyen wa a lata kata de gaw galoi mung laknak n jahkrat na re” nga La Seng tsun ai. “Anhte gaw KIO a simsa lam hpe dingbai dingna n jaw ga ai, anhte n’dai shara kaw nga nga ai hpe KIO ni n ra ai rai yang gaw, anhte kaga de sa mat na.”

KIO hku na gaw ABSDF jawng ma ni hpe ya ten hta kaga de sa n ra shi ai lam hte n’dai ginra hta naw matut nga mai ai lam tsun wa ma ai.

Raitim, KIO du n’kau mi the Laiza nga ABSDF jawngma hte ni nawn ai salang ni gaw Myen hpyen du ni n’dai hku galaw wa ai gaw ABSDF hpe jahpai n’na KIO kata hta dingbai dingna jaw mayu ai majaw re ngu shadu ma ai.

“Laiza a shimla hpe maram yu yang, anhte hpe galoi aten hta raitim hpyen wa kaw n’na lu rim la na zawn rai nga ai” nga n’na gat dut kanbau bungli galaw nga sai jawngma dap hpyen la dingsa Win Niang tsun ai.

Laiza nga Salang langai mung, “N’dai [ABSDF] ni nga n’na hpa manghkang n’naga ai,” hte malawng maga KIO magam gun lawu tsang ni gaw n kam gawt kau ai raitim, Myen ni hte jahkrup da ai Slg ni myiman tam mayu na gawt mayu lam gaw nga ai ngu tsun wa ai.

N’dai lam hte seng n’na Thai mung nga ABSDF ningbaw Than Khe gaw mara shagun tsun shaga ai lam n’nga ai raitim, “ABSDF hku na KIO a akyu amyat hpe hkra ai lam ni hpe galoi mung galaw na n re ai hte, anhte hku na KIO hpe myusha lamyan a matu shakut shaja nga ai uhpung langai hku na sha mu mayu ga ai,” ngu tsun wa ai.

1994 ning KIO hte Myen hpyen asuya a lapran gap hkak jahkring ten hpyen asuya kaw n’na ABSDF dap ni laknak jahkrat na matu shadut wa sai. Dai ten hta ABSDF (northern Branch) hku n’na KIO the rau buga gaw sharawt lam galaw na matu Myen hpyen asuya hte gap hkat jahkring na jahkrup wa sai raitim Myne hpyen du ni hku na ningdang kau sai rai nga ai.

1988 ning Myen mung ting Democracy hpyishawn ai shaloi gasu gamawng ai ten hta shang lawm lai mat sai Myen mung lahta daw na jawngma ni gaw, 1989 ning kaw n’na KIO Ginjaw Pajau Bum de hprawng lung wa n’na Dap Dung (701) hpaw let shamu shamawt wa sai. KIA hte pawng hpawn n’na mung Myen hpyen asuya hpe gasat lai wa sai rai nga ai.