Khin Nyunt a Mungmasa Matsun hpe KIO Hkap Tau

The Kachin Post

September 11, 2003—Wunpawng Mungdan Shanglawt hpung KIO hku na Myen hpyne asuya a mungmasa lam matsuna hpe hkap tau la ai hte myusha yawng shang lawm lu ai National Convetion hpe mung madi shadaw ai lam tsun wa ai.

KIO a madi shadaw lam hpe Myen hkring mang daju Khin Nyut hpang de laika hte September shata 2 ya shani hta shagun ya ai rai nga ai. August shata htum hta Khin Nyunt hku na ninggam 7 lawm ai mungmasa matsun hpe n’dau shabra wa ai.

Myen hkringmang daju hpang shagun laika hta KIO hku na myushan hpung ni hte pati yawng shang lawm lu ai national convention hpe ra sharawng ai lam hte, dai zuphpawng de sa du na dat kasa ni hpe tinang a hpung ni ralata na ahkang lu ra na ngu matsun da ai.

“Grau damlada ai, grau hkum tsup ai mungmasa pati ni, myusha dat kasa ni mung yawng shang lawm ai hku na galaw wa ai rai yang gaw KIO mung shang lawm na re,” ngu KIO ningbaw langai rai nga ai Du kaba Gauri Zau Seng tsun wa ai. “Raitimmung KIO hku sa na kun, Kachin myusha ni hku shang lawm na kun ngu ai gaw mung shawa ni hte jahkrp la na she daw dan na re.”

National convention gaw 1993 ning hta Myen hpyen asuya hku na woi galaw hpang wa ai rai n’na 1996 ning hta jahkring da ra ai rai nga ai.

1994 ning KIO hte Myen hpyen asuya ni gap hkat jahkring ngut ai hpang KIO dat kasa ni hpe dai zuphpawng de lung na matu saw shaga sai rai nga ai.