Myusha ni a Mungmasa Lam Matsun N’dau

The Kachin Post

September 6, 2003—Thai mung dan kaw rung jung ai Myen mung na Myusha hpawng chyawm hpung hku na Myen mung mung masa manghkang ni hpe paran na matu mung masa lam matsun langai hpe August shata 5 ya shani hta n’dau shabra dat ai.

Ethnic Nationalities Solidarity and Cooperation Committee (ENSCC) kawn woi awn let myusha ni a rasharawng ai mungmasa lam matsun hpe Thai mung dan Chiang Mai mare kaw galaw ai zuphpawng hta shana shabra dat ai. N’dai mung masa lam matsun hpe Yanggon kaw nga ai Myen hpyen du ni hpang de mung shagun ya na ngu chye lu ai.

Myusha ni a mung masa lam matsun gaw ninggam lahkawng rai n’na a’ten ladaw 6 ning masat da ai rai nga ai. Shawng na ninggam hta ‘Congreess for National Unity’ hpe shawng hpawng na matu tang shawn da ai. Dai Congress hta 1990 ning ralata poi hta dang da ai mung masa hpung ni hte Hpyen dap na dat kasa ni mung lawn ra ai lam tang shawn da ai. Ninggam lahkawng hta gaw mungshawa madi shadaw lam la n’na ralata poi hpe galaw sa wa na ngu matsun da ai.

“N’dai hku tang madun ai gaw Mungmasa hta Popular byin na matu n re, galaw ging ai hte, n’dai gaw kaja htum ngu ai hta madung dat n’na tang madun ai re” ngu dai zuphpawng hta shang lawm ai ENSCC malawm Salai Lian Sakhong tsun wa ai.

Laiwa sai shata masum lapran Myen mung mung masa mahtai tam na hte seng n’na n’dau shabra wa ai mungmasa lam matsun ni kaw na n’dai myusha ni na gaw 3 lang ngu na rai nga ai. Thai asuya hku na shawang ning nan mungmasa matsun hpe laiwa sai June shata hta n’dau ai rai n’na, August shata 30 ya shani hta Myen hkringmang daju Khin Nyunt hku na ninggam 7 lawm ai mung masa matsun hpe n’dau wa ai.

Myusha hpung ENSCC gaw laiwa sai 2001 August shata hta Karenni National Progressive Party, the National Democratic Front hte United Nationalities League for Democracy (Liberated Area) ni kawn hpaw hpang wa ai rai nga ai.