N’sen Langai sha re Lam KDA Tsun

The Kachin Post

December 18, 2003— Myen Hpyen asuya hte gap hkat jahkring da ai Kachin Defense Army (KDA) gaw National Convention hta Kachin Independence Organization (KIO) hte n’sen langai sha re ai lam tsun wa ai hpe KIO shiga lawk hku chye lu ai.

N’dai zawn National Convention hte seng n’na myit hkrum mahku hku na lam hpe uhpung lahkawng a ningbaw ni hkrum ai ten hta tsun shaga wa ai rai nga ai.

KDA hte KIO ningbaw ni gaw December 13 ya shani hta Sam Mung Sinli mare kaw galaw ai nawku jawng dingshawn shang poi hta hkrum shaga ma ai rai nga ai.

December shata 12 ya kawn 15 ya shani du hkra galaw ai ‘Sam Sasana’ nawku jawng dingshawn shang poi hta KIO ningbaw Du kaba Lamung Tu Jai woi awn ai hpung hte KDA ningbaw Mahtu Naw woi awn ai hpung ni hkrum zup jahta hkat wa ai lam chye lu ai.

KIO hte Zahkung Tingying ningbaw ai New Democratic Army-Kachin (NDA-K) ni gaw National Convention hta shang lawm na hte seng n’na Myen hpyen asuya a hkring mang daju Khin Nyunt hte Yangon mare hta hkrum jahta ngut sai rai nga ai. Uhpung lahkawng yen hku na dat kasa 5 hpra lung na matu mung daw dan da sai rai nga ai.

KDA hpung gaw ya ten du hkra National Convention hte seng n’na Myen hpyen du ni hte bawng ban ai lam n nga shi ai hpung langai rai nga ai. KDA gaw Myen hpyen asuya hte 1990 ning hta gap hkat jahkring lam la da ai hpung langai rai nga ai.