Kunming Gatrai Madun Poi de KIO Du ni Sa
The Kachin Post
August 26, 2003—Miwa gunsan mung Kunming mare kaw galaw ai gatrai madun poi de Wunpawng mungdan shanglawt hpung (KIO) ginjaw Slg ni sa du ma ai hpe KIO shiga lawk hku na chye lu ai.
KIO ginjaw slg ni rai nga ai Dr. La Ja, Du kaba Lasang Aung, Du kaba Gam Shawng hte Slg kaba Lajawng Hkawng Lum ni sa du ma ai lam, ginjaw hte ni nawn ai KIO du langai tsun dan wa ai. KIO ningbaw Du Kaba Lamung Tu Jai gaw shawng e sa na hkyen da ai rai tim n lu sa ai rai nga ai.
11 lang na Kunming arai madun poi gaw Yunnan mungdaw na Kunming mare kaw August shata 26 kawn 28 ya du hkra galaw na rai n’na Sinpraw Dingdung Asia mungdan hpung (ASEAN) mungdan yawng shang lawn na rai nga ai.
Ndai lang na Kunming poi gaw moi na zawn hpaga dap na ni hpe sha shaga ai sha nga lak lai ai hku na hpung a ningbaw ni hpe mung saw shaga ai rai nga ai. "Miwa ni gaw anhte na masa ni madat mayu ai" majaw re ngu KIO du tsun ai.
Yunnan uphkang du ni hku na n’dai poi hta KIO hpung sha n ga Jinghpaw mung the Sam mung na Myen hpyen asuya hte gap hkat jahkring da ai myusha hpung ni hpe saw shaga ai rai nga ai. Myu sha hpung Sanit daram hpe saw shaga ai lam hpe dai hpung ni the ni nawn ai shiga lam hku chye lu ai.
Miwa ni ndai zawn myusha hpung ningbaw ni hpe n’dai poi de shaga ai lam the seng n’na myen mung, mung masa hpe yu dinglik nga ai ni hku na gaw Miwa ni hku na myen mung na myusha ni a n’sen hpe na mayu ai majaw re ngu sawn la ma ai.
"Miwa ni gaw myusha hpung ni hpe lak nak jahkrat na n ra sharawng ai zawn Myen hpyen du ni hte bai gap hkat na hpe mung n ra sharawng ai," ngu Miwa mung nga mungmasa dinglik nga ai Slg langai tsun wa ai. Miwa ni gaw myusha ningbaw ni the mungmasa lam jahkrup mayu ai lam nga ai ngu kahtap tsun wa ai.
Lai wa sai August 16 ya shani gap hkat jahkring da ai myusha hpung ni the Myen Kaichyan du Kyaw Win ni Yangon mare kaw hkrum n’na, May 30 ya Depeyin mare na mabyin ni hpe sang lang dan wa ai. Ndai myusha hpung ni gaw Depeyin mabyin the seng n’na myit n pyaw ai lam hpe laiwa sai July shata praw hta ndau shabra ai rai nga ai.
May 30 ya Depayin mabyin gaw Myen mung Democracy ningbaw Aung San Suu Kyi hte shi a malawm ni hpe Myen hpyen asuya a mashan ni hku na si hkrung si htan shamyit ai mabyin rai nga ai.
