Labau shang Mung shawa zuphpawng

The Kachin Post

October 22, 2002—Myusha yawng a shawng lam gam maka hte seng na grai ahkyak nga ai aten hta shawng ningnan lang ngu na Wunpawng mung masa bawng ban hpawng hpe KIO hpung hku na woi awn let Jinghpaw mungdaw Laiza mare hta October shata 21 ya shani kaw na hpawng nga sai rai nga ai.

Zuphpawng de du lung ai ni tsun ai hku rai yang 300 jan ai dat kasa ni du lung ai rai n'na dai hta Dakkasu jawng ma ni hte mung masa la ni mung lawm ai lam chye lu ai. Manga ya na na ndai zuphpawng hta JW myusha ni a shawng lam hte seng n'na madung dat bawng ban na rai nga ai.

“Anhte myusha yawng a gawng malai tai ya na Wunpawng myusha mungbawng Rapdaw langai hpe gaw de sa wa na re ngu myit mada ai,” ngu zuphpawng hta shanglawm ai jawngma langai tusun wa ai. “Hpa majaw nga yang gara mung masa hpung hta mung, mung masa hte seng n'na ya ten hta tsun shaga ahkang n nga ai hku re,” ngu matut tsun wa ai.

Mung masa manghkang rawtjat ai lam n nga ai majaw JW myusha yawng yak hkak jam jau ai hkrum sha nga ai rai nga ai. Lai wa sai 1994 ning hta KIO hku n'na Myen hpyen du ni hte sim sa lam la ai raitim mung masa manghkang hpe paran na matu ya ten du hkra galaw sa wa ai lam n mu lu shi ai rai nga ai.

“Ya n'dai gaw galaw nan galaw ra ai ninggam langai mi rai n'na du na ra ai aten na anhte myusha yawng a matu gawng malai tai lu na mahtai langai pru wa na re ngu yawng gaw mu mada nga ai,” ngu mying n tsun ai KIO Du langai Kachin Post de tsun dan wa ai.

Dai zuphpawng hta Pang Wa de na New Democratic Army-Kachin (NDA-K) kaw na ningbaw Sahkong Ting Ying hte dat kasa marai 40 daram shang lawm ma ai raitim Sam mung de na Kachin Defense Army (KDA) kaw na data kasa ni sa du ai lam n nga ai hpe chye lu ga ai. N'dai zuphpawng hpe Myen hpyen du ni hku na galaw na matu ahkang jaw ai hte maren zuphpawng grupyin na Laiza mare hkan gaw Myen kaichyan du ni law law hpe mu lu ai ngu laiza nga ni tsun wa ma ai.

N'dai zawn mung chying sha dat kasa yawng shang lawm ai zuphpawng hpe Myen hpyne du ni hku na ahkang jaw ai hte seng n'na mungmasa la n'kau gaw grai sadi sahka hte myit sawn nga ai lam mung chye lu ga ai.

“Ngai dai zuphpawng de n lu lung na re, hpa majaw nga yang zuphpawng shaga ai lam hta mung masa hte seng ai lamang hkrak rai n tsun dan da ai,” ngu Kachin National Congress for Democracy (KNCD) ningbaw Duwa Zau Ing tsun dan wa ai. Shi gaw n'dai zuphpawng n du shi ai laman UN dat kasa Mr. Paulo Sergio Pinheiro hte hkrum na matu Yangon de rawt sa wa sai rai nga ai.

Laiwa sai June shata hta KIO hpung hku na zuphpawng kaba langai hpe shi a ginjaw hta galaw lai wa sai raitim n'dai lang na zuphpawng zawn mung shaw dat kasa ni hpe saw shaga ai lam n nga ai rai nga ai.

Lak nak lang da ai KIO, NDA-K hte KDA ni gaw lai wa sai ten hta Myen hpyen du ni hte gap hkat jahkring da ai raitim mung masa hte seng na tsep kawp tsun shaga na ahkaw ahkang n nga ai hte maren KNCD pati hku na mung 1990 ning Ra lata poi hta rapdaw shara masum dang lu da ai raitim Myen hpyen du ni hku na mung masa shamu shamawt lu na ahkaw ahkang hpe pat da ya ai rai nga ai.