Myen Dawnghkawn hpe Ninghkap na N'dau

The Kachin Post

October 19, 2002—Du na ra ai October shata 21 ya shani hta Wunpawng mungdan shanglawt hpung ginjaw kaw na woi galaw na Mungchying shawa hpawng hta Myen Asuya dawng hkawn jung sharawt da na nga ai lam hte seng na myusha yawng jawm ninghkap na matu Pan kachin hpung hku na n'dau shabra ai lam chye lu ai.

“Tinang a Dawng Hkawn hpe n-gun mi alu rai sharawt tawn da na gaw ahkyak kaba dik rai nga ai,” ngu dai laika hta tsun da nga ai. Matut na tinang a buga hta hpa n seng ai Myen hpyen wa a dawng hkawn hpe sharawt tawn na ngu ai gaw gara hku mung n mai hkap la ai lam tsun da nga ai.

Myen dawng hkawn jung na lam hte seng n'na “Anthe mungchying sha ni hku na Myen dawng hkawn ginjaw hta sharawt da na hpe grai ninghkap mayu ai raitim lahta Slg ni woi galaw ai re majaw ganing n chye di ga ai,” ngu Laiza nga Slg langai Kachin Post de tsun dan wa ai.

Laiwa sai June shata hta galaw ai KIO zuphpawng hta ginjaw Slg langai hku na Pajau hta Myen dawng hkawn jung da na matu tang shawn wa ai lam hpe mying n tsun ai KIO Du langai tsun dan wa sai rai nga ai.

Ya ten hta dai zuphpawng de du sa ai masha ni grai lawhtam wa nga ai hte maren Myen dawng hkawn jung da na hte seng na law malawng myit yak nga ai lam chye lu ga ai. Dai zuphpawng de Simsa lam matut mahkai ya ai Slg Hkun Myat hte Sara Saboi Jum ni mung lung na lam chye lu ga ai.